“Sahibkarlara bu günə qədər bir milyard manat məbləğində güzəştli kreditlər verilib. Ancaq hər bir rayonun rəhbər orqanları özləri çalışmalıdır, şərait yaratmalıdır, sahibkarları cəlb etməlidir və onların fəaliyyətinə buna görə qiymət veriləcək”. Bunu Azərbaycan Prezidenti İlham Əliyev Ağstafada “Karvan-L EKO” sənaye parkında inşası başa çatdırılan müəssisələrin və istixana kompleksinin açılışında müəssisənin işçiləri və rayon ictimaiyyətinin nümayəndələri ilə görüşündə söyləyib.
Mütəxəssislərin fikrincə, ölkə rəhbəri tərəfindən icra
başçılarının qarşısına qoyulan bu vəzifə regionlarda sahibkarlığın
daha dinamik inkişafına yol açacaq. “Ekonomiks” Beynəlxalq İqtisadi
Araşdırmalar Birliyinin sədri iqtisad elmləri doktoru, professor
Fikrət Yusifov bildirir ki, ölkədə dərin iqtisadi islahatların
aparıldığı yeni dönəmdə icra hakimiyyəti orqanları qarşısında yerli
iqtisadiyyatın inkişafını təmin etməklə bağlı yeni – daha ciddi
vəzifələrin qoyulması tam məntiqə uyğun bir addımdır: “İndi yerli
iqtisadiyyatda əldə edilən nəticələr icra hakimiyyəti orqanlarının
fəaliyyətinə qiymət verməyin yeganə ölçüsünə çevrilir. Bu, o
deməkdir ki, yerli icra strukturları artıq üzlərini iş adamlarına
çevirməli və onlara yardımçı olmalıdırlar. Bu sahədə dönüşün
yaranması ilə bütövlükdə ölkə iqtisadiyyatında, onun qeyri-neft
sektorunda ciddi nəticələr əldə ediləcək.
Son bir ildə ölkə başçısı tərəfindən qəbul edilən qərarlarla
sahibkarlığın qarşısında olan bütün maneələr aradan qaldırılır. Ona
görə də bu gün Azərbaycanın bütün bölgələri həm daxili və həm də
xarici investisiyaları cəlb etməyin münbit məkanına çevrilir. İndi
yerlərdəki iqtisadi durum daha çox yerli icra hakimiyyəti
orqanlarının rəhbərlərinin bu sahədə aparacağı işin
səmərəliliyindən asılı olacaq”.
Mübariz BAYRAMOV