Azərbaycanda ümumdaxili məhsul istehsalı (ÜDM) bu il 1% artacaq. Bu barədə Beynəlxalq Valyuta Fondunun "Qafqaz və Mərkəzi Asiya" ilə bağlı açıqladığı növbəti proqnozda deyilir. Proqnoza əsasən, 2017-ci ildə Azərbaycanda 2,4%-lik iqtisadi artım olacaq.
Maraqlıdır ki, bundan öncə BVF bu il üzrə Azərbaycanda 2,4%-lik
iqtisadi azalma, gələn il üzrə isə 1,4%-lik artım proqnozlaşdırıb.
Amma indi proqnozlar yaxşılaşdırılıb. BVF tərəfindən Azərbaycanın
iqtisadi göstəriciləri əhəmiyyətli dərəcədə yaxşılaşdırılmasını
iqtisadçılar müxtəlif rakursdan izah edirlər.
İqtisadçı-ekspert Natiq Cəfərli bildirdi ki, Beynəlxalq Valyuta
Fondunun bu il üçün verdiyi proqnozla Azərbaycan hökumətinin
verdiyi rəsmi rəqəmlər arasında bir qədər fərq yaranıb: “Bəlkə də
BVF-nin tarixində ilk belə hadisədir. Belə ki, hökumətin verdiyi
rəsmi rəqəmlərə görə, car ilin doqquz ayında ÜDM-də bir qədər
azalma var idi. İlin son üç ay müddətində neftin qiymətinin bir
qədər yüksəlməsini və Azərbaycanda iqtisadi aktivliyin
sürətlənməsini nəzərə alsaq, ÜDM-də vəziyyət dəyişə bilər. Amma
göründüyü kimi, BVF bu il Azərbaycanda ÜDM-də 1 faiz artımın
olacağını proqnozlaşdırır.
Qeyd edək ki, ilk dəfədir BVF-nin verdiyi proqnoz daha optimisdir.
Gələn il üçün verilən proqnoz isə daha ağlabatandır. Azərbaycanda
ÜDM-nin artımı gözlənilir. Hökumət gələn il üçün 1.5 faiz ÜDM
artımını proqnozlaşdırır. Ancaq BVF burada da daha optimistdir. BVF
gələn il Azərbaycanda daha böyük artımın olacağını bildirir. Amma
burada obyektiv səbəblər var. 2017-ci ildə neftin qiymətinin 60
dollar olacağı gözlənilir. Əgər belə olacaqsa, Azərbaycanda ÜDM
artacaq”.
Digər iqtisdçı-ekspert Cəfər İbrahimli bildirdi ki, BVF mütəmadi
olaraq Qafqaz və Mərkəzi Asiya ölkələri ilə bağlı hesabatlarını
verir: “Ancaq bu il Azərbaycan üçün verilən proqnoz diqqəti çəkir.
Çünki, rəsmi açıqlamalara görə, cari ildə iqtisadi daralmalar var.
ÜDM-də təxminən 4 faizə qədər azalma qeydə alınıb.
İlin 4-cü rübündə isə ÜDM-in 1 faiz artımını necə
proqnozlaşdırıdıqları maraqlıdır. Böyük ehtimalla bundan sonrakı
dönəm üçün kənd təsərrüfatı məhsullarının yığımından əlavə olunacaq
dəyərin müsbət qatqısını gözləyirlər. İkinci səbəb kimi onu
göstərmək olar ki, iqtisadiyyatda mütəmadi olaraq aşağı və yuxarı
trendlər yaşanır. Amma heç bir ölkədə trendin daim aşağı və ya daim
yuxarı gedəcəyi baş vermir. Müəyyən nöqtədən sonra trendin
dəyişməsi hiss olunur. Son zamanlar hökumətin apardığı islahatları,
özəl sektor və biznes mühitində təkmilləşmənin həyata keçirilməsini
ciddi müsbət amil kimi göstərmək olar. Dövlət şirkətlərində
şəffaflığın artırılması ilə bağlı bir neçə sərəncamlar verildi.
Əlavə olaraq özəl sektor şirkətlərində də bu mühit yaradıldıqca
iqtisadiyatda böyümə tendensiyanın saxlanılacağı gözləniləndir.
BVF-nun qiymətləndirməsi böyük ehtimalla bu aspektdəndir”.
Mübariz BAYRAMOV