Hər il bu vaxtlar olduğu kimi, yenə də Bakının bir neçə
marketində fantastik qiymətə alça satılır. 1 kiloqram alçanın
qiyməti 450- 500 manat civarında dəyişir. Bundan əlavə, qablarda
10-11 ədəd alçanı 110 manata satışa çıxarıblar.
İqtisadi Resursların Öyrənilməsi Mərkəzinin sədri Ruslan Atakişiyev
bildirirki, adətən, satıcılar mövsümü olmayan məhsulun qiymətini
hiper səviyyədə artırmağa çalışırlar: “Ancaq mövsümi olmadığına
görə, hər elə məhsulların çox alıcısı da tapılmır. Yalnız çox
imkanlı şəxslər 500 manatlıq alçanı almaqda maraqlı ola bilərlər.
Elə nadir alıcısı olduğuna görə də satıcı bu şəkildə baha qiymətə
təklif edə bilir. Ancaq vəziyyətin bu cür olmaması üçün müəyyən
kənd təsərrüfatı məhsullarını anbarlarda dondurulmuş şəkildə
saxlamaq olar.
Nəzərə alaq ki, aztəminatlı ailələr alçanın əvəzedicisi kimi alça
turşularından əvəz edirlər. Amma əsl məhsulun qışda qiymətinin bu
qədər şişməsini istəmiriksə, yayda yetişən zaman anbarlarda
saxlanılması ilə onu qışa çatdırmaq mümkündür”.
Kənd təsərrüfatı sahəsi üzrə mütəxəssis Çingiz Fərəcov bildirdi ki,
hər bir məhsulun yetişdirilmə dövrü var: “Təbii olaraq alça həmişə
yaz aylarında açıq məkanda yetişir. Əgər başqa dövrdə alça
yetişirsə, o, genetik modifikasiya olunmuş bitki məhsuludur. Həmin
alça xarici ölkələrdən gətirilib. Ona görə də alçalar
laboratoriyada yoxlanılmalıdır. Ancaq təəssüflər olsun ki, bizdə
GMO yoxlayan laboratoriyalar yoxdur.
Göründüyü kimi, indi alça çox baha qiymətə satılır. Həmin
məhsulları hər kəs ala bilmir. Yalnız imkanlı şəxslərin alması
mümkündür. Ancaq bu məhsuldan istifadə məqsədəuyğun deyil.
Həddindən artıq iri məhsul olur. Hansı ki, təbii alça o həcmdə ola
bilməz”.
Ekspert əlavə etdi ki, adətən meyvələri 6-7 ay saxlamaq mümkün
deyil: “Hər bir bitkinin özünün saxlanma texnologiyası var. Ən çox
pomidor və xiyarı saxlamaq mümkündür ki, onun da müddəti bir ay
yarımdır. Alça fevral-mart aylarında yetişən məhsuldur. O vaxtı
yetişmiş alçanı oktyabr ayına qədər saxlamaq olmaz. Bunların hamısı
istixanalarda yetişmiş məhsullardır, xarici ölkələrdən gətirilib. O
alçanın da indi istifadəsi yolverilməzdir”.
Mübariz BAYRAMOV
