26 aprel 2013-cü il tarixdə AMEA Mərkəzi Elmi Kitabxanasında (MEK) görkəmli oftalmoloq alim, ictimai xadim, Əməkdar elm xadimi, AMEA-nın ilk qadın həqiqi üzvlərindən biri, tibb elmləri doktoru, professor Zərifə xanım Əliyevanın anadan olmasının 90 illik yubileyinə həsr olunmuş konfrans-sərgi keçirilib.

"Elmin və ləyaqətin zirvəsində" adlı tədbiri  MEK-in direktoru, f.ü.e.d. Aybəniz Əliyeva-Kəngərli giriş sözü ilə açaraq akademik Zərifə Əliyevanın alim kimi qazandığı böyük uğurların Azərbaycan tibb elmi tarixində ayrıca bir mərhələ təşkil etdiyini, elmi fəaliyyətinin çox zəngin və əhatəli olduğunu vurğulayıb. Tədbirin AR Prezidenti İlham Əliyevin 7 fevral 2013-cü il tarixli "Akademik Zərifə Əliyevanın 90 illik yubileyinin keçirilməsi haqqında" sərəncamına uyğun olaraq keçirildiyini qeyd edən A.Əliyeva-Kəngərli Zərifə Əliyevanın SSRİ-də gözün zədələnməsinin öyrənilməsi və profilaktikası sahəsindəki bir sıra orijinal kəşflərinə görə SSRİ Tibb Elmləri Akademiyasının akademik M.İ.Averbax adına mükafatına layiq görülmüş ilk qadın olduğunu xüsusi vurğulayıb.

Tədbirdə "Tanrı nuru, ümid işığı" adlı məruzə ilə f.ü.e.d., professor Gülşən Əliyeva çıxış edərək akademikin keçdiyi ömür yoluna nəzər salıb.

Sənətşünaslıq üzrə fəlsəfə doktoru Zülfiyyə Eldarqızı Zərifə Əliyevaya həsr olunmuş poeziya nümunələri ilə çıxış edib.

Sonra Z.Əliyevanın həyatı və elmi fəaliyyətini əks etdirən sərgiyə baxış keçirildi. Sərgidə akademikin əsərlərindən "Возрастные изменения глаза и зрительно-нервного пути" (1980), "Академик Зарифа Алиева", "Офтальмол-потология при хранической йодовой интоксикации" (1981), "Основы ириродиагностики" (1982), "Актуальные проблемы офтальмологии" (1983) və s. monoqrafiyaları nümayiş etdirilib.

Tədbirin sonunda akademik Zərifə Əliyevanın həyat və elmi fəaliyyətini əks etdirən videoçarx nümayiş etdirildi, elektron biblioqrafik göstəricisinin təqdimatı keçirilib.