Aprelin 9-da Azərbaycan Respublikasının maliyyə naziri Samir Şərifov "Cənubi Qafqazın və Mərkəzi Asiyanın gələcəyi ilə bağlı strateji dialoq" mövzusunda Dünya İqtisadi Forumunda iştirak etmək üçün Bakıya gəlmiş Asiya İnkişaf Bankının (AİB) Mərkəzi və Qərbi Asiya Departamentinin direktoru Klaus Gerhauseri qəbul edib. 

Mövqe.az-ın məlumatına görə, görüşdə Azərbaycan ilə AİB arasında əməkdaşlığın uğurla inkişaf etdiyi vurğulanmış, mövcud kredit portfelinin qiymətləndirilməsi, yeni ölkə tərəfdaşlıq strategiyası, o cümlədən ölkəmizin Bank ilə birgə həyata keçirdiyi su, nəqliyyat və digər infrastruktur layihələri barədə müzakirə aparılıb. 

K.Gerhauser Bakıda keçirilən Dünya İqtisadi Forumunun Azərbaycanla dünya ölkələri arasında iqtisadi əlaqələrin daha da dərinləşməsi baxımından əhəmiyyətini vurğulayıb.

Elə həmin gün S.Şərifov Dünya İqtisadi Forumunda iştirak etmək üçün ölkəmizdə olan Avropa Yenidənqurma və İnkişaf Bankı (AYİB) idarə heyətinin üzvlərini də qəbul edib. Görüşdə Azərbaycan ilə AYİB arasında əməkdaşlığın müxtəlif istiqamətləri, o cümlədən respublikamızda həyata keçirilən yol-nəqliyyat kompleksinin və infrastrukturunun yenidən qurulması və digər məsələlər ətrafında fikir mübadiləsi aparılıb. 

S.Şərifov qonaqları maraqlandıran sualları cavablandırıb, ölkəmizdə gedən inkişaf prosesləri, əldə olunan nailiyyətlər barədə ətraflı məlumat verib.