Bu gün Azərbaycan müğənnilərinin əcnəbi həmkarları ilə duetlərinə demək olar ki, nadir hallarda rast gəlinir. Halbuki, dünya musiqi sənətində belə duetlərin sayının artdığını görmək mümkündür. Təzə layihə hazırlayan, yerli müğənnilərimizlə türk sənətçilərinin duetlərini təşkil edən bəstəkar Nailə Mirməmmədli Mövqe.az-a bildirdi ki, bizim müğənnilərimizin əcnəbi müğənnilərlə duet oxuması heç də problemli məsələ deyil: "Yerli şou- biznes müğənnilərimizin xarici müğənnilərlə duet oxumamasının yeganə səbəbi məktəbin olmamasıdır. Bizdə opera-vokal məktəbi var, amma estrada məktəbi elə də inkişaf etməyibdir. Məsələn, caz konservatoriyası Gürcüstanda var, ancaq Azərbaycanda yoxdur. Ölkəmizdə səhnə üçün müğənni hazırlaya bilən, mahnı janrında ifanı bacaran müğənni yetişdirə bilən müəllimlər barmaqla sayıla biləcək qədərdədir. Çox azdır, bir-iki elə insan olar. Qaldı bəziləri deyir ki, maliyyə çatışmamazlığına görə oxumurlar, bu yanlışdır.

O məktəb-studiyanı ki, mən açmaq istəyirəm, dəstək olsa, açaram. 2 illik təhsil alan müğənnilərimizin daha başqa yerə getməyə ehtiyac qalmayacaq. Biz "Euroivision" yarışması üçün daha heç yerdən adam axtarmayacağıq. Məktəbi bitirən şəxslər hazır kadr olacaqlar. Canlı orkestrlə ifa edə bilən gənc müğənnilər hazırlaya bilərik. Maliyyə dəstəyi olsa, elə məktəbi açardım. Və bu zaman xarici müğənnilərlə də duet oxumağın heç bir problemi olmaz".

Dünyanın məşhur caz ustalarının da iştirak etdiyi beynəlxalq caz festivalında iştirak edərək Azərbaycanı layiqincə təmsil edən, əvvəllər "Rast" qrupunda solist-ifaçı kimi fəaliyyət göstərən, indi isə fərdi yaradıcılıqla məşğul olan Sevda Ələkbərzadə də mövzu ilə bağlı Mövqe.az-a danışdı: " Mənim duetlərim çox az olub. Biri bacım Emma Ələkbərzadə, digəri isə Elşad Xose ilə olub. Ancaq bu yaxınlarda musiqisi mənə aid olan bir mahnıya duet ortağı olaraq xarici bir müğənnini düşünürəm. Ancaq hələ mahnı hazır olmadığı üçün bu barədə heç nə deyə bilmərəm. Ümumiyyətlə, xarici müğənni ilə duet oxumaq üçün çox miqdarda vəsait tələb olunur".

S. Ələkbərzadə çox sevdiyi əcnəbi müğənni ilə duet oxumaq niyyətiindən də danışdı: "Mən heç vaxt əcnəbi müğənnilərlə oxumamışam. Ancaq indiyə kimi ən böyük arzum olub ki, Stiv Vonderlə duet oxuyum".