Xəbər verildiyi ki, Avronestin Enerji Komitəsinin Bakıda keçirilən iclasında iştirak edən ARDNŞ-nin vitse-prezidenti Elşad Nəsirov sensasiyalı bəyanatla çıxış edib. İranla bağlı beynəlxalq gərginliyə toxunan ARDNŞ rəsmisi İrana qarşı hərbi əməliyyatlar barədə danışıldığını bildirib: "Bu əməliyyatlar başlasa, İran raketləri ABŞ-a gedib çatmayacaq.
İsrailin də çox güclü hava hücumundan müdafiə sistemi var. İran Rusiyanı vurmayacaq, Ermənistana da toxunmayacaq. O zaman İran raketlərinin hədəfi "Şahdəniz" yatağı olacaq. Onlar Avropanı enerji ilə təmin edən ilkin təbii enerji mənbələrinə zərbə vuracaqlar".
Ekspertlər isə səsləndirilən bu fikrə qismən razılaşdıqlarını bildirdilər. Belə ki, siyasi şərhçi Natiq Mirinin sözlərinə görə, burada söhbət, sülh şəraitində Azərbaycanın vurulmasından getmir: "Söhbət bölgədə böyük bir savaşın olduğu və xüsusi ilə də İrana qarşı hərbi əməliyyatların başlaması, onun "küncə" sıxışdırılması çərçivəsində İranın adekvat addımlarından gedir. Təbii ki, belə olduğu təqdirdə İran rejimi istənilən düşünülməmiş addım ata bilər. Amma bu addımlar İranı hərbi əməliyyatların nəticəsindən xilas edə bilməyəcək. Onu da nəzərə almaq lazımdır ki, gedən ayaqda olan hakim rejim istənilən dağıdıcı proseslərdən istifadə edəcək. Bu, təkcə Azərbaycanla bağlı deyil. Eyni zamanda Türkiyə və bir çox Yaxın Şərq ölkələrini də bu sıraya əlavə etmək olar. Belə bir məqamda "Şahdəniz" yatağının vurulması İran rejiminin maraqlarına uyğun ola bilər. Çünki, "Şahdəniz" yatağından çıxan qaz, bilavasitə Qərbə yönəlikdir. O baxımdan İran Azərbaycanın deyil, məhz Qərbin strateji maraqlarını vurmaq üçün, bu cür əməliyyatlardan istifadə edə bilər. Yəni, bu, tamamilə özünü doğruldabiləcək bir açıqlamadır. Ancaq, bu, yalnız və yalnız İrana qarşı hərbi əməliyyatların başladığı təqdirdə mümkün ola bilər. Əks təqdirdə İran nəyə görə özünə yeni savaşın, cəbhənin açılmasına rəvac versin ki?! O baxımdan belə planlar hər an masanın üstündə ola bilər. Ancaq yaxın müddət üçün İrana qarşı hər hansı bir hərbi əməliyyatların keçirilməsini gözləmirəm. Çünki, ABŞ-ın İrana qarşı siyasətində elə bir dəyişikliyin olması hiss olunmur. ABŞ İrana qarşı tətbiq olunan embarqo siyasətini daha da daraltmaqla onun iqtisadiyyatına ciddi zərbələr vurmaq istəyir ki, İran bunun müqabilində geri çəkilsin. ABŞ vitse-prezidentinin İranı ikitərəfli dialoqa çağırması da bunun bariz nümunəsidir ki, artıq İran özünün çıxış yolunun olmadığını anlamalıdır. İkitərəfli danışıqlar vasitəsi ilə nüvə problemini çözmək mümkün ola bilər. Onsuz da hansısa mərhələdə ikitərəfli danışıqlar baş tutacaq. Çünki, İranın bundan başqa çıxış yolu yoxdur. Tətbiq olunan embarqolar getdikcə sıxlaşdırıldıqca İranda sosial etirazlar qalxacaq. Həm də nəzərə alaq ki, bu il İranda prezident seçkiləri keçiriləcək. Odur ki, bu cür narazılıqların artma ehtimalı böyükdür".
Hərbçi ekspert Üzeyir Cəfərovun sözlərinə görə, bu gün Azərbaycanın hava məkanı lazımınca qorunur: "Sözsüz ki, "Şahdəniz" yatağı dənizdə yerləşsə də, Azərbaycan ərazisindədir. Orada baş verə biləcək təhlükənin qarşısını almaq üçün, Azərbaycanın kifayət qədər imkanları var. Lakin "Şahdəniz" təkcə Azərbaycan aid deyil. Orada 7 üzv var. Ona görə də əgər bir problem olarsa, təkcə Azərbaycanla məhdudlaşmayacaq. İranın bu hərəkətini istisna etmək olmaz. Amma İranın belə ağlasığmaz bir addım atacağını düşünmürəm. Çünki, bu, faktiki olaraq daha ciddi fəlakətlərə gətirə bilər. ABŞ İsraillə birlikdə İrana güc tətbiq etsə, İranın başqa variantları var. Məsələn, İran yaxın ərazilərində yerləşən ABŞ hərbçilərinə qarşı hansısa hərəkəti həyata keçirə bilər".
Azərbaycan Müdafiə Nazirliyindən isə məsələni şərh etmədilər.
