“Azərbaycan ATƏT Parlament Assambleyasında çox böyük və gözəl nailiyyətlər qazanıb”.

Movqe.az xəbər verir ki, bunu Milli Məclis Aparatının rəhbəri Səfa Mirzəyev deyib.

Onun sözlərinə görə, parlamentin fəaliyyətinin əsas istiqamətlərindən biri də beynəlxalq əlaqələrdir: “Bu iş də əsasən iki istiqamətdə gedir. Birincisi, Milli Məclis hazırda bu və ya digər dərəcədə 11 beynəlxalq parlament təşkilatı ilə əməkdaşlıq edir. Bunların da çoxunun üzvüyük.

İkincisi, Milli Məclisin nümayəndə heyətləri bir sıra beynəlxalq təşkilatlarda geniş fəaliyyət göstərirlər. Məsələn, keçən ay ATƏT Parlament Assambleyasının Lüksemburqda keçirilən illik sessiyasında Azərbaycan nümayəndə heyəti gözəl nəticələr əldə edib. İlk dəfə dondurulmuş münaqişələr haqqında qətnamədə Azərbaycanın adı digər dövlətlərlə eyni sırada sadalanıb. Bilirsiniz ki, əvvəllər  Azərbaycanı erməni lobbisinin fəaliyyəti nəticəsində ayırırdılar. Ukrayna, Gürcüstan, Moldova bir gedirdi. Heç Azərbaycanın adı çəkilmirdi, Dağlıq Qarabağ münaqişəsi kimi gedirdi. Bu, bizim çox böyük nailiyyətimizdir”. 

Milli Məclis Aparatının rəhbəri Azərbaycanın Türkdilli Dövlətlərin Parlament Assambleyasındakı (Türk PA) fəaliyyətinə də toxunub: “Türk PA böyük təşkilat olmasa da Azərbaycan üçün çox vacib qurumdur. Bizim Türk PA-dakı nümayəndə heyətimizə Milli Məclisin sədri Oqtay Əsədov rəhbərlik edir. Bu faktın özü Türk PA-nın Azərbaycan üçün əhəmiyyətini göstərir. Bura türkdilli ölkələrin birləşməsi üçün vacib platformadır. Biz indi Özbəkistan və Türkmənistanı da Türk PA-ya cəlb etməyə çalışırıq”.