İslam Əməkdaşlıq Təşkilatı Xarici İşlər Nazirləri Şurasının “Təhsil və maarifçilik - Sülh və yaradıcılığa aparan yol” devizi altında Daşkənddə keçirilən 43-cü sessiyasında Ermənistan əleyhinə qətnamə qəbul olunub. Sənəddə Ermənistanın Azərbaycana qarşı təcavüzünə və təcavüz nəticəsində işğal olunmuş Azərbaycan ərazilərində İslam tarixinə və mədəniyyətinə aid abidələrin dağıdılması pislənilir. Bu, təcavüzün aradan qaldırılması uğrunda Azərbaycanın apardığı mübarizədə yeni diplomatik uğurdur.
Ümumiyyətlə, təşkilata üzv olduğu vaxtdan bəri Azərbaycan İƏT-ın
bir çox iclaslarında ərazisinin işğalı məsələsini qaldırıb və hər
dəfə təcavüzkar tərəfi qınayan qətnamə qəbul edilib. İndiyədək
İsmabadda, Cakarta, Tehran, Doha və digər islam ölkələrinin
paytaxtlarında keçirilmiş sessiyalarda qəbul edilmiş qətnamə və
bəyannamələrdə ölkəmizin haqq səsi eşidilib, məsələnin mahiyyəti
öyrənilib, müzakirə aparılıb və hər dəfə Ermənistanın hərəkətlərini
pisləyən sənədlər qəbul olunub. Sənədlər çox olsa da məzmunca
müxtəlifdir və siyasi, iqtisadi, mədəni və mənəvi mövzular üzrə
işğalçının törətdiyi dağıntılar, mədəni irs nümunələrini məhv
etməsi qətiyyətlə pislənir. İslam Əməkdaşlıq Təşkilatı Ermənistanı
təcavüzkar, Xocalı faciəsini isə soyqirımı kimi tanıyan ilk
beynəlxalq təşkilatdır.
Təşkilatın İstanbul sammitində Qarabağ üzrə təmas qrupu yaradılıb.
İƏT Gənclər Forumu və digər struktur bölmələri Azərbaycanın haqq
işini müdafiə edən moxsaylı tədbirlər, layihələr həyata keçirib və
keçirir.
Daşkənd qətnaməsi də davam edən təcavüzün qurbanı olan islam
tarixinə və mədəniyyətinə aid abidələrin dağıdılmasına qarşı
yönəlib. Qətnamədə Ermənistanın təcavüzü nəticəsində Azərbaycan
torpaqlarının iyirmi faizinin işğal edilməsindən, bu işğalın davam
etməsi və Azərbaycan ərazilərinin birtərəfli qaydada fiziki,
demoqrafıq, iqtisadi, sosial və mədəni xarakterinin, eləcə də
institusional strukturu və statusunun Ermənistan Respublikası
tərəfindən dəyişdirilməsindən, habelə işğal olunmuş Azərbaycan
ərazilərində ictimai və şəxsi mülkiyyətin məhv, talan edilməsi və
mənimsənilməsindən, o cümlədən sözügedən ərazilərdə təbii
sərvətlərin qeyri-qanuni istismarı, bu sərvətlərdən hazırlanmış
məhsulların qanunsuz ticarətindən ciddi və dərin narahatlıq ifadə
edilir və vandalizm aktı kimi qiymətləndirilir. Təşkilata üzv
dövlətlər Ermənistanın təcavüzü nəticəsində bir milyondan artıq
azərbaycanlının qaçqın və məcburi köçkün vəziyyətinə düşməsindən,
onların acınacaqlı halından dərin təəssüf hissi keçirtdiklərini
bildirir və BMT Təhlükəsizlik Şurasının müvafiq qətnamələrinin tam
şəkildə yerinə yetirilməsinə çağırış edirlər.
57 islam ölkəsini birləşdirən İslam Əməkdaşlıq Təşkilatı bu gün
dünyanın nüfuzlu beynəlxalq qurumlarından biridir. Dağlıq Qarabağ
münaqişəsinə təşkilatın diqqət yetirməsi və onun nizamlanması
prosesində beynəlxalq hüquq və normalara əməl edilməsinə çağırışlar
etməsi böyük əhəmiyyətə malikdir. Məsələ burasındadır ki, xristian
dövləti Ermənistan əhalisinin 95 faizi müsəlman olan Azərbaycanın
torpağının bir hissəsini işğal edib. İşğal prosesində təcavüzkara
kömək edən dövlətlərin hamısı xristian dövlətləridir. İşğaldan
sonra başlanan sülh danışıqları prosesinin əsas iştirakçıları da
(Minsk Qrupunun həmsədrləri) xristian dövlətləridir. Multikultural
və multikonfessial dəyərlər nə qədər güclü olsa da, ümumiləşsə də,
danışıq stolu ətrafında formalaşmış bu struktur ədalətli sayıla
bilməz. Çünki, MQ-nin fəaliyyətsizliyi və daha dəqiq ifadə etsək,
xristian tərəfkeşliyi danışıqların gedişində, verilən təkliflərdə
aydın görünür. Tarixi həqiqət, beynəlxalq müstəvidə ölkələrin qəbul
etdiyi hüquq və normaların pozulması ilə tolerant Azərbaycana qarşı
belə mövqe sərgilənməsi müasir dövrün heç bir hüquqi və mənəvi
normativinə sığmır. Belə bir situasiyada İƏT-in mövqeyi və
çağırışları buraxılan boşluqların doldurulmasında təkzibolunmaz
faktdır.
Bundan başqa BMT-də aparılan müzakirələrdə və qəbul edilən
sənədlərdə təşkilat üzvlərinin yekdillik göstərməsi də mühüm
şərtdir. Bu mənada İƏT-in Daşkənd qətnaməsi aktual sənəddir və MQ
həmsədrlərinin münaqişənin nizamlanması üzrə göstərdiyi işartıların
fonunda prosesə təsir edə biləcək çağırışdır. Güman edirik ki,
Azərbaycanın işğal edilmiş əraziləri üzrə təşkilatın hazırkı və
əvvəllər qəbul edilmiş sənədləri münaqişəsinin həlli üçün
əhəmiyyətlidir və getdikcə bu sənədlərə qoşulanların sayının
artması gözləniləndir..
N.NOVRUZ