Bu il payız soyuq gəldi. Yağışın günlərlə davam etməsi, havanın hərarətinin qəfil enməsi oktyabr ayında Bakıda hələm-hələm baş verən hadisə deyil. Nə etmək olar, təbiətin işinə qarışmaq olmaz, necə məsləhətdirsə, elə də olacaq. Amma nüanslar da var. Məsələn, ölkədə siyasi hərarət heç azalmayıb, əksinə bir qədər də artıb.
Referendumda əhalinin səpkilədiyi fəallıq başa çatmamış Avropa
İttifaqı qapının ağzını kəsdirdi. Bir az umu-küsü, narazılıq və
minnətdən sonra qapılar açıldı, arzular dilə gəldi, heç demə,
avropalı yetkililər Azərbaycandan ötrü bu bir ildə yaman
qəribsəyiblər. Heç elə bil bir ay əvvəl radikal müxalifətə dil
verən bunlar deyilmiş. Bəli, siyasi rəğbət, sağlıq-filandan sonra
get-gəl əvvəlki axarına düşüb. Bəyanat-zad da öz yerində. Amma di
gəl ki, bu radikallar heç nə baş verməmiş kimi susurlar.
Bəlkə, heç Avropa Parlamenti ilə razılaşmalar, əməkdaşlıq lazım
deyil! Həmişə tənqid edənlər niyə dinmirlər? Axı, Avropada vəziyyət
bərbaddır. Mühacirət məsələsi, iqtisadi böhran, Rusiya ilə ciddi
rəqabət, islamofobiya... Belə bir birliyin təşkilatları ilə iş
birliyinə getmək nə dərəcədə düzgündür?! Əsas məsələ isə odur ki,
birdən sabah Azərbaycanda yenə referendum, yaxud hansısa başqa bir
siyasi məsələ gündəmə gəldi. Onda, iqtidarla münasibətləri
normallaşan avropalılar mitinqə-zada pul ayıracaqlarmı? Ancaq
deyəsən, bir balaca işıq ucu var: bəs, əgər radikallar iqtidarla
avropalıların təmaslarının bərpa olunması münasibətilə mitinq
keçirsələr, buna münasibət necə olar? Yəni, maliyyə-filan sarıdan.
Axı, maliyyə olandan sonra mitinq keçirməyə nə var ki?! Nə isə..,
susqunluq olsa da naməlumluq ucbatından vəziyyət gərgindir.
Lakin “Human Rights Watch” adlı beynəlxalq insan haqları təşkilatı
aranı qarışdırmaq üçün fəaliyyətini səngitməyib. Təşkilatın
Azərbaycan haqda oktyabrın 20-də açıqladığı son hesabatda əsasssız
tənqidlər əksini tapıb. Müdriklər deyir ki, “ağıllı adamı bir dəfə
aldatmaq olar, eyni mövzuda ikinci dəfə aldananın ağıllılıq
məsələsi şübhə altına düşür”. İndi avropalı deputatların səhvlərinə
görə Azərbaycandan üzr istəmələri bu “Human Rights Watch”a niyə
dərs olmur, bu da şübhəlidir. Nədən ki, bu təşkilatın göstərdiyi
faktlar o qədər yayğın və müəmmalıdır ki, bunların təkzibi başının
üstündən asılı qalıb. Bir himə bənddir ki, puça çıxarılsın. Adı
çəkilən hesabatda yazılır: “HRW araşdırmalar nəticəsində üzə
çıxarıb ki, 2016-cı ildə Azərbaycan hökuməti, ən azı, 20 siyasi
fəalı, o cümlədən gəncləri həbs edib. Siyasi fəalları, eləcə də
jurnalistləri məhkəməyə çəkmək üçün qondarma, siyasi motivli
inzibati və cinayət ittihamlarından yararlanıb. Fikirlərinə görə
tutulanlar qanunsuz narkotik maddə saxlamaqda, ya da qanunsuz
biznes fəaliyyətində günahlandırılıblar. Bəzi fəallar isə Türkiyədə
çevrilişə cəhddə ittiham olunan ilahiyyatçı Fəthullah Gülənlə
əlaqədə təqsirləndirilərək həbs edilib”. İctimaiyyətin gözü
qabağında baş vermiş cinayətlərdə bulunan, dövlət əleyhinə çevriliş
təbliğatı aparanların tutulması nə vaxtdan hüquq pozuntusu sayılıb?
Fətullah Gülənin terrorçu olduğu Türkiyə timsalında sübuta
yetirilib. Lakin baş ofisi Nyu-Yorkda yerləşən “Human Rights Watch”
başbilənləri bunu siyasətlərinə uyğun yozurlar. Belə çıxır ki, kim
istəsə dövlət çevrilişi edər və bu onun müstəsna insani hüququdur,
hətta bu yolda yüzlərlə insanı qətlə yetirsə də. Heyrətamiz
nəticədir, deyilmi? Yenə adam sual verməyə məcbur qalır: Görəsən,
“Human Rights Watch”-ın əsas ofisi ABŞ-da olmasaydı F.Gülənə və
tərəfdarlarına qarşı cinayət işi açılmasını hüquq pozuntusu
sayardımı? Bunlar kimin gözünə kül üfürürlər, məlum deyil. Məlum
olan isə pul qarşılığında kiminsə diqtəsilə
oturub-durmalarıdır.
İndi qayıdaq özümüzə və yenə də sual edək: özünü radikal müxalifət
adlandıranlarla “Human Rights Watch” arasında xarakter fərqi
nədədir? Sual aydındır: Heç nədə!
N.NOVRUZ