Türkiyə Respublikasının xarici işlər naziri Mövlud Çavuşoğlunun Avropa Şurasında keçirilən brifinqdə jurnalistlərə Qarabağın 5 rayonunun qaytarılması haqda verdiyi anons müzakirə mövzusu olaraq qalır. Lakin bundan bir neçə gün sonra Minsk Qrupunun amerikalı həmsədrin Bakıdakı brifinqdə əvvəlcə bütün ərazilərin qaytarılması, azərbaycanlı qaçqın və məcburi köçkünlərin doğma yurd-yuvalarına qayıtması və Dağlıq Qarabağın statusunun müzakirə olunacağı barədə dedikləri də böyük diqqət cəlb etdi. Arada Rusiyadan münaqişənin nizamlanmasında Türkiyənin səmərəli rol oynayacağı barədə fikrin ortalığa atılması da diqqəti ən çox cəlb edən məsələlərdən olub. Demək, söhbət gedir, Qarabağ münaqişəsinin nizamlanması məsələsi gündəmdədir.
İndi qalır bir məsələni dəqiqləşdirmək: Minsk Qrupunun həmsədr
ölkələri və ayrıca olaraq Rusiya həqiqətən əməli addımlar atmaq
üçün danışır, yoxsa əvvəlki illərdə olduğu kimi “danışmaq xatirinə
danışır”. Yəni, imitasiya davam edir, ya yox?!
Açığı, həmsədr nümayəndələrin dedikləri hər fikrin başına ip salıb
fırlatmalı olsaq, çözülməli məsələlər çox olar. Fikrimizcə, həmsədr
ölkələr nə vaxt ki, Qarabağ barədə birmənalı düşünməyə
başlayacaqlar, onda sülh regiona ildırım sürətilə daxil olacaq.
Amma hələlik 5 rayon söhbətinə qayıdaq.
Rəsmilərin dediklərindən belə anlaşılır ki, Rusiya və Türkiyə
Dağlıq Qarabağ ətrafındakı 5 rayonun qaytarılması barədə
razılıqlarını bildiriblər. Yəni, Rusiya təklif edib, Türkiyə də
razılığını bildirib. Dialoqu ictimaiyyətə təklif edən Türkiyə
tərəfi “Azərbaycanın istədiyi şəkildə” ifadəsi də unutmayıb.
Azərbaycan isə hələlik konkret fikrini bildirmir. Çünki, məlum
deyil ki, 5 rayon müqabilində Rusiya ondan Ermənistan üçün nəyi
tələb edəcək.
Ancaq hər halda, ndiki situasiyada 5 rayonun qaytarılması
Azərbaycan üçün və haqq-ədalət naminə o şərtlə məqbul ola bilər ki,
Ermənistan ordusu həmin rayonlarda geri çəkilər, əvəzində
Azərbaycan da Türkiyə-Ermənistan sərhədlərinin açılmasına mane
olmaz. Boşaldılmış rayonlarda həyatın canlanması istər-istəməz
Dağlıq Qarabağda yaşayan ermənilərlə azərbaycanlılar arasında
müəyyən təmasların yaranmasına səbəb olacaq. Bu, təxminən 5 ilə
oturuşa bilinən məsələdir. Daha sonra 2 rayon boşaldılar, ardınca
isə azərbaycanlılar Şuşaya və digər rayonlara qayıtmaqla Dağlıq
Qarabağa muxtar respublika statusu verilməklə sülh prosesi sona
çatdırılar.
Bu araad Ermənistanın “1in.am” saytı Dağlıq Qarabağ münaqişəsinin
həlli ilə bağlı hazırlıq prosesinin getdiyini yazıb. Sayt yazır ki,
Ermənistan ictimaiyyəti ərazilərin qaytarılmasına hazırlanır:
“Moskva əvvəlcə erməni ictimaiyyətini Türkiyənin münaqişədəki
roluna öyrəşdirir. Yəni, birinci mərhələdə bu məsələ Ermənistanda
müzakirə müstəvisinə keçir. Ermənistanın “Türkiyənin iştirakına
yekdil inkar” mərhələsindən müzakirə mərhələsinə keçidi təmin
olunur. Əslində, bunun çətin olmayacağı və Ermənistan rəhbərliyinin
Türkiyənin münaqişənin həllində rolunu qəbul edəcəyi məlumdur. Bu,
baş tutandan sonra ikinci mərhələyə keçid olacaq. İkinci mərhələdə
soyqırımın (qondarma “erməni soyqırımı” - red) arxa plana keçidi
təmin olunacaq. Üçüncü mərhələdə isə münaqişənin həlli və
ərazilərin qaytarılması baş verəcək. Daha sonra türk və rus
sülhməramlıları Qarabağa daxil olaraq, təhlükəsizliyi öz üzərlərinə
götürəcəklər. Bu barədə Ankara və Moskva qapalı təmaslarda artıq
razılaşıb”
N.NOVRUZ