Radikal müxalifət düşərgəsində yenidən süstlük hökm sürür. Xatırladaq ki, ölkədə keçirilən referendum ərəfəsi radikal müxalifət də “fəallaşmışdı”. Əli Kərimli və onun dəstəsi, radikal dini kəsimi də ətrafına toplayaraq bir neçə dəfə aksiya təşkil etdilər. Çox can-fəşanlıq etmələrinə rəğmən, həmin mitinqlərə yenə də çox adam toplaya bilmədilər. Çünki, əhalinin bu qüvvələrə olan etibarı artıq sıfır həddindədir.
O da bir dah abəlli oldu ki, əvvəlki illərdə olduğu kimi,
radikal müxalifət yenə də özbaşına deyil, məhz xaricdəki
Azərbaycanı sevməyən dairələrin göstərişi ilə referendum ərəfəsi
müəyyən qədər fəallaşmışdılar. Bu vəziyyətin özü də bir daha
göstərir ki, radikallar xaricilərin sifarişi və verdikləri maliyyə
əsasında fəaliyyət göstərirlər. Ona görə də bu radikallar vətəndaşı
olduğu dövlətə və xalqına deyil, ancaq onlara xidmət edirlər. Artıq
belə fikirlər səslənir ki, daha əcnəbi ağaları radikallara sifariş
və pul verməyi dayandırıblar. Məhz bu səbəbdən də radikal müxalifət
düşərgəsində hazırda mövcud olan süst bir durum yaranıb. Görünür,
əcnəbi ağalar radikallardan artıq üz dönədrib.
Politoloq Elşən Manafovun fikrincə, sözügedən qüvvələrə sifariş və
maliyyə verən xarici dairələr Azərbaycan xalqının radikallara
dəstək vermədiyini gördükcə, həmin qüvvələrdən üz dönədrməyə
başlayıblar: “Əslində, müxalifətin radikal qanadının fəallaşması
bir qayda olaraq ölkədə keçirilən seçki və digər siyasi proseslər
ərəfəsinə təsadüf edir. Seçki ərəfəsi ölkədəki mövcud
ictimai-siyasi duruma fərqli anlaşmanın olduğunu göstərmək və daha
çox anlamda isə özlərinin Qərbdəki himayədarlarının dəyirmanına su
tökmək üçün radikallar mitinqlər keçirir, aksiyalar təşkil edirlər.
Belədə ilk baxışdan hər şey iqtidarın siyasətinə təzyiq etmək
anlamını verir. Amma müxalifətin keçirdiyi mitinqlərdə ölkədəki
narazı elektoratın heç əllidə bir hissəsinin belə iştirak etməməsi
göstərir ki, əslində, həmin kütlələrin bu radikal müxalifətə
etimadı yox dərəcəsindədir.
Fikrimcə, müxalifətin məlum qanadını illər boyu istiqamətləndirən
və maliyyələşdirən dairələr də yəqin ki, bu barədə düşünürlər.
Çünki radikal müxalifət narazı elektoratın etimadını qazana bilmir,
onlara səs verərək narazılar küçələrə çıxmırsa, bu amil təbii ki,
etimadsızlıq sindromu kimi qəbul olunmalıdır. Digər tərəfdən,
müxalifətin məlum qanadına olan münasibət AXCP-Müsavat cütlüyünün
hakimiyyətdə olduğu dönəmdə həyata keçirilən siyasətilə bağlıdır
ki, əhalinin əksəriyyəti sözügedən qüvvələrin hakimiyyətdə olduğu 1
il ərzində daxili və xarici siyasətdə yol verdikləri ciddi
nöqsanlar və dövlətçiliyin başı üzərini ciddi təhlükənin aldığını
unutmayıb. O vaxt ulu öndər Heydər Əliyev yenidən hakimiyyətə
qayıtmasa idi, Azərbaycan dövlətçiliyinin bu günə qədər gəlib
çıxması məsələsi ciddi sual altında qala bilərdi. Digər tərəfdən,
müxalifətə olan etimadsızlığın bir məqamı da ondan ibarətdir ki,
radikallar hakimiyyətin həyata keçirdiyi siyasi-iqtisadi kursu
tənqid edir, lakin alternativ proqramlarla çıxış etmirlər. Hətta
etdikləri tənqidi çıxışların özü də sağlam tənqid deyil. İqtidarın
siyasətində olan müsbət və pozitiv amilləri radikal müxalifət
görməməzliyə vurur. Ölkə parlamentində təmsil olunan müxalifətin
məlum qanadından fərqli olaraq radikal müxalifət hakimiyyətlə
münasibətləri konstruktiv zəmində qurmaq və genişləndirməkdən
uzaqdır. Əslində, radikal müxalifətin bu və ya digər ölkəyə gətirə
biləcəyi “uğur” və “töhfə” Suriya və ya Liviya anlamında qəbul
oluna bilər. Ona görə də düşünürəm ki, yaxın müddətdə müxalifətin
məlum qanadının liderlərinin dəyişə biləcəyilə bağlı məsələlər də
gündəmdə ola bilər. Bu müxalifət özünün Qərbdəki himayədarlarının
ümidlərini doğrultmursa, təbii ki, yeni şəxs və simaların tapılması
üçün müvafiq addımlar atılacaq, müvafiq layihələr üzərində
düşünüləcək. Bütövlükdə, bu, həm də onun göstəricisidir ki, ölkədə
seçicilərin mütləq çoxluğu Prezident İlham Əliyevin həyata
keçirdiyi daxili və xarici siyasətin mahiyyətini anlayır, ona
dəstək verir. Keçirilən son referendumun nəticələri də bunun bir
daha bariz nəticəsi oldu”.
Milli Məclisin deputatı, Vəhdət Partiyasının sədri Tahir Kərimli bu
qənaətdədir ki, xarici dairələrin bu günə qədər dəstək verdikləri
radikal müxalifətdən üz döndərmələri onların zəif olduğunu anlaması
və bu fonda da yeni qüvvələr axtarmaq niyyətilə bağlı ola bilər:
“Sirr deyil ki, Azərbaycanı istəməyən, ölkəmizə düşmən münasibət
bəsləyən Qərbdəki bir sıra dairələr dövlətimizə təzyiq etmək üçün
daxildəki müəyyən qüvvələrdən istifadə edirlər. Daxildə bu rolda da
çıxış edənlər, hər zaman özlərini, dövlətini satmağa hazır duran
radikal müxalifət dairələridir.
Uzun müddətdir ki, xaricdəki həmin qüvvələr Azərbaycanla bağlı öz
çirkin niyyətlərini reallaşdırmaq üçün müxalifətin məhz hazırkı
radikal dairələrindən istifadə edib. Son referendum ərəfəsi də
bildiyiniz kimi radikallar bir neçə aksiya təşkil etdi. Həmin
dövrdə radikalların liderlərinin Qərbin bir sıra ölkələrinin
Bakıdakı səfirliklərilə görüşməsi də onu göstərir ki, müxalifətin
bu kəsiminin fəallaşması da xaricdən gələn sifariş və maliyyə
dəstəyinin nəticəsidir. Lakin həmişə olduğu kimi, radikalların bu
cəhdi də fiaskoya uğradı. Referendum uğurla keçdi və xalqın böyük
əksəriyyəti orada qoyulan və dövlətçiliyimizin möhkəmlənməsinə
xidmət edən dəyişikliklərə səs verdi. Bu fonda da radikal müxalifət
referendumdan dərhal sonra yenidən süstlük dövrünə qədəm qoydu.
Çünki artıq aldıqları maliyyə dəstəyi dayandırıldı. Deməli, xarici
hamiləri də artıq onlara dəstək verməkdən vaz keçiblər. Bu da onu
göstərir ki,artıq xaricdəki qüvvələr də Azərbaycanda mövcud olan
radikal müxalifətlə həyata keçirmək istədikləri planlarını
reallaşdıra bilməyəcəklərini anlamağa başlayıblar. Məhz bu səbəbdən
də indi onlardan üz dönədrirlər. Xarici dəstək olmadığı halda isə,
radikal kəsim ümumiyyətlə hər hansısa bir fəaliyyət göstərmək
iqtidarında deyil. Çünki onlar bir tərəfdən ölkə qanunlarını əsas
tutaraq normal siyasi fəaliyyət göstərmək qabiliyyətinə sahib
deyillər, digər tərəfdən də daxildə social dayaqları yox
dərəcəsindədir. Bütün bunların nəticəsidir ki, radikal müxalifət
hazırda «ölü bir duruma» düşüb və onların bu durumdan çıxması
qeyri-mümkündür”.
Rüfət NADİROĞLU