Məlum olduğu kimi fevralın 18-də Ermənistanda növbəti prezident seçkiləri keçriləcək. Bu prosesdə hazırkı dövlət başçısı Serj Sarkisyan da daxil olmaqla 8 namizəd iştirak edir. Proseslərin gedişi ondan xəbər verir ki, Ermənistandakı hazırkı seçkilər də saxtakarlıq və zorakılıqla müşayiət olunacaq. Artıq hakimiyyətin bütün resursları Sarkisyanın qələbəsinə hesablanıb. Müxalifətdən olan namizədlər də açıqladığı bəyanatlarda seçkilərin şəffaf keçməyəcəyinə işarə vururlar. Bütün bunlarfonunda əksər ekspertlər Sarkisyanın növbəti 5 ildə də Ermənistana başçılıq edəcəyini düşünürlər. Qeyd edək ki, Sarkisyanın başa vurduğu 5 il ərzində Ermənistanın tutduğu qeyri-konstruktiv mövqe üzündən Dağlıq Qarabağ konflikti yenə də həll olunmamış qaldı. Sarkisyan dönəmində həmin münaqişə həll olunmaq əvəzinə sanki daha da dalana dirənib. Siyasi arenaya Azərbaycan torpaqlarının işğalında iştirakla qədəm qoyan Sarkisyan indi yenidən Ermənistanda hakim rolda olmaq niyyətindədir. Bu halda görəsən, Sarkisyanın yenidən hakimiyyətdə qalması Dağlıq Qarabağ probleminin həllinə nə vəd edir?
Politoloq Qabil Hüseynli düşünür ki, Sarkisyanın yenidən seçilməsilə də Dağlıq Qarabağ münaqişəsinin həllində hər hansı bir yenilik baş verməyəcək: "Sarkisyanın yenidən seçilməsindən sonra da Ermənistan münaqişənin həllilə bağlı əvvəlki sərt mövqeyində qalacaq. Hətta düşünürəm ki, növbəti seçimdən sonra Sarkisyan hökuməti Dağlıq Qarabağ məsələsində daha aqressivliyilə yadda qalacaq. Hazırda Rusiya Ermənistanı ciddi şəkildə silahlandırır. Kollektiv Təhlükəsizlik Müqaviləsi Təşkilatının akademiyasını da Ermənistanda yaratmağı düşünürlər. Hətta əlavə desant qüvvələri də gətirirlər. Bir sözlə seçkilərdən sonra Ermənistanın danışıqlar prosesində qeyri-konstruktivliyinin daha da artacağı, danışıqlar prosesini tez-tez pozacağı daha çox güman edilir. Əsas məsələ isə dünyanın, xüsusən də Minsk qrupu həmsədr ölkələrinin bu məqama necə diqqət yetirməsilə bağlıdır. Minsk qrupu həmsədrlərindən Rusiya isə özünü tamamilə nüfuzdan salıb. Onlar açıq-aşkar şəkildə təcavüzkarı müdafiə, Azərbaycanı isə təhdid edir. Belə bir dövlətin isə Minsk qrupunda qalması absurddur. Həmçinin onların nəyisə bizdən tələb etməsi də ikiqat absurddur. Məsələ əsasən də Rusiya tərəfindən dolaşdırılır. Ermənistan isə Rusiyanın əlaltısı, buyruq qulu kimi onun dedikləriən əməl etməklə məşğuldur. Bütün bunlara görə də danışıqlar prosesində işıqlı nəsə görmək çətindir".
Milli Məclisin Analitik-İnformasiya Şöbəsinin müdiri Aydın Ağayev də bildirdi ki, Sarkisyanın yenidən prezidentlik kreslosunu ələ keçirməsi Dağlıq Qarabağ konfliktinin həllinə heç nə vəd etmir: "Vəd edə də bilməz. Sarkisyan kimiləri məhz işğalçılıq müharibəsindən çıxıb, onlar siyasi kapitallarını həmin müharibə nəticəsində qazanıblar. Həmin işğalçı müharibə də Sarkisyanları Qarabağdan Ermənistana gətirib. İndi də onlar Ermənistanda söz sahibidirlər. Dağlıq Qarabağ münaqişəsində cüzi də olsa normal dəyişiklik yalnız və yalnız Ermənistanın hər mənada sığındığı üçüncü dövlətin məsələyə münasibətindəki bu və ya digər ehtimal oluna biləsi dəyişikliklərlə bağlıdır. Lakin indilikdə bu dəyişikliklər də qətiyyən görünmür. Ermənistan heç bir kompromisə gedən deyil. Sarkisyan seçilsə, daha 5 il hakimiyyətdə oturacaq. 5 ildən sonra onu əvəz edən bir ayrısı gələcək. Amma Qarabağ ətrafındakı situasiya ermənilərin qeyri-konstruktivliyi üzündən yenə də olduğu kimi qalacaq. Sarkisyanın 5 il öncəki təbliğatı da qatı antiazərbaycan, antitürk mövqeyində olub. Onun kimiləri rus qüvvələrinin köməyilə etdikləri işlərlə qürrələnir, bundan lovğalanır, hətta siyasi etikanı belə aşırlar. Bu o Sarkisyandır ki, Azərbaycan əhalisini qırğına verməkdən qürrələnmişdi. O, həmçinin, erməni gənclərilə görüşündə Qarabağı özləri aldıqlarını, Türkiyənin yarısının alınmasının isə erməni gənclərinin üzərinə düşdüyünü bildirib. Belə görüşlərə məxsus bir şəxs yenidən prezident seçilirsə, o, öz baxışlarında Dağlıq Qarabağın həlli yolunda heç bir dəyişiklik edə bilməz. Torpaqlarımızı işğal etmiş bu etnos yalnız zor gördükdə konfliktə münasibətini dəyişə bilər. Ona görə də indilikdə ermənilər ruslardan yapışıblar. Bilirlər ki, Rusiyadan asılı olmasalar perspektivləri qətiyyən yoxdur. Ona görə də deyirəm ki, Sarkisyanın yenidən seçilməsinə rəğmən Dağlıq Qarabağ məsələsinin həlli Ermənistanın daxili məsələsi deyil. Təəssüf ki, bu xarici məsələdir".