Statistik rəqəmlərə görə, bu gün Azərbaycanda təqribən 28. 5 min nəfər dövlət qulluqçusu var. Bu rəqəmin də əhalinin sayına olan nisbəti onu göstərir ki, hazırda 1 dövlət qulluqçusu təqribən 324 min vətəndaşa xidmət göstərir. Amma dövlət qulluqçusunun payına düşən əhalinin sayı baxımından Azərbaycanda olan göstərici Avropa ölkələri ilə müqayisədə kəskin dərəcədə fərqlənir. Belə ki, Azərbaycanda formalaşmış 324 min rəqəmi Avropada orta hesabla 14 mindir. Hətta əhalisinin sayına görə ön sıralarda olan Rusiya Federasiyasında bu göstərici 90 min, Yunanıstanda 28.7 min, Almaniyada isə 18.45 min təşkil edir. Xatırladaq ki, hazırda Azərbaycanda büdcə təşkilatı sayılan qurumların işçilərinin hamısı dövlət qulluqçusu statusunu daşımır. Burada hələlik, təhsil və səhiyyə sektoru istisnalıq təşkil etməkdədir.

"Müvəkkil" Hüquq Mərkəzinin sədri Səməd Vəkilovun sözlərinə görə, ilk öncə dövlət qulluqçusunun sayı yox, göstərdikləri xidmətin keyfiyyəti önəmlidir: "Dövlət qulluğu haqqında" qanunun 8-ci maddəsində dövlət orqanlarının maaşı və təsnifatı göstərilib. Bilirik ki, bizdə müəllimlər dövlət qulluqçusu statusu daşımırlar. Müəllimləri də dövlət qulluqçuları siyahısına daxil etsək, onda adambaşına düşən dövlət qulluqçusunun sayı artacaq. Amma bu artımı keyfiyyət baxımdan demək olmaz. İkinci tərəfdən Azərbaycanda alimlərin sayına görə Gürcüstan Respublikasından da geri qalırıq. Vəkil sayına görə isə bu iş lap pisdir. Azərbaycanda cəmi 800 vəkil var".

Hüquqşünas bildirir ki, Bakıda monitorinq keçirsək, bəzi dövlət müəssisələrində sıxlıq müşahidə edərik: "Amma bu, o, anlama gəlmir ki, dövlət qulluqçusunun sayı azdır. Yəni, əsas təlabat tənzimlənməlidir. QHT-lər monitorinq apararaq, gündəlik həmin müəssisələrə müraciət edən vətəndaşların sayını öyrənməlidirlər. Monitorinqlər aparılmalı və dövlətə, universitetlərə sifariş verilməlidir. Hansısa sahəyə ehtiyac varsa, orada işçilərin sayı artırılmalıdır. Yəni, bu təmərküzləşmə tələb – təklif üzərində qurulmalıdır".