"Standartlaşdırma, Metrologiya və Patent üzrə Dövlət Komitəsinin şadlıq evlərilə bağlı hazırlanan standartların tətbiqi ilə əlaqədar verilən vaxt sabah tamam olur. Artıq sabahdan etibarən şadlıq evlərində standartların tətbiqi ilə bağlı yoxlamaların aparılması üçün işlərə başlanılacaq".  Bu məlumatı Movqe.az-a açıqlamasında Komitənin mətbuat xidmətinin rəhbəri Fazil Talıblı verib. Onun sözlərinə görə, standartların tətbiqi üçün nəzərdə tutulan tarix həftəsonuna təsadüf etdiyindən, sabahdan yoxlamaların aparılacağı şadlıq evləri ilə bağlı qrafik tutulacaq: "Gələn həftədən etibarən isə yoxlamalara başlanılacaq. Yoxlamalar zamanı şadlıq evlərinin mətbəxlərində çalışan heyətin tibbi müayinədən keçməsi və yoluxucu xəstəliklərin olmadığı haqqında arayış alması ilə yanaşı, sarayda çalışan adinistratorun, süfrəçinin, barmenin, somelyenin və aşbazların işlədikləri sahə üzrə təhsilli olib-olmadığı,  rəqs meydançasının, menyuda göstərilən yeməklərin tərkibinin standartlara uygunluğu və sair təftiş ediləcək. Bu yeni qayda Standartlaşdırma, Metrologiya və Patent üzrə Dövlət Komitəsinin hazırladığı "Şadlıq saraylarının təsnifatı və qaydalar" dövlət standartında nəzərdə tutulub. Təbii ki, bizim nümayəndələr birdən-birə şadlıq evlərində standartlara əməl etməyən sahibkarlara qarşı sərt tədbirlər görməyəcəklər. Yəni əslində məqsəd sahibkarlıq obyektlərinə qarşı hər hansı təyziqlər etmək yox, tədricən bu sahədə vəziyyəti standartların tələblərinə uyğunlaşdırmaqdır. Odur ki, biz sahibkarlara yenidən müraciət edərək onları  standartların tələblərinə əməl etməyə çağırırıq".
F. Talıblı şadlıq evlərində aparılacaq yoxlamaların keçirilən məclisləri pozmayacağını, sadəcə olaraq standartın tələbinə uyğun olub-olmadığnın yoxlanılacağını bildirdi. Onun sözlərinə görə, bəzi mətbu orqanlarda standartların tətbiqinin şadlıq evlərində qiymət bahalaşmasına səbəb olacağı barədə iqtisadçı proqnozları səhvdir: "Standartların tətbiqi heç bir halda qiymətləri bahalaşdırmayacaq. Çünki, bunun üçün sahibkarlardan sadəcə standartların tələblərinə əməl etmət tələb olunur".