Bakı avtovağzalında qiymətlərin süni şəkildə qaldırılması problemini bundan əvvəl də dəfələrlə qabartmışıq.Lakin məlum olur ki, problem hələ də həll olunmayıb.  "Bakı-Xudat və Bakı-Xaçmaz istiqamətində hərəkət edən avtobuslarda həyasızcasına gediş haqqını qaldırırlar.Bu haldan narazı olan sərnişinlərin sayı isə kifayət qədərdir.  Bakıdan Xaçmaza gediş haqqı 2,5 manat olduğu halda, sərnişinlərdən 4 manat tələb edirlər. Əlində bilet avtobusa daxil olan insanları isə avtobusdan çıxarırlar və deyirlər ki, get kim səni biletlə apararsa, onun avtobusuna min.

Məsələyə aydınlıq gətirmək üçün biz,  Bakı Beynəlxalq Avtovağzalının növbə rəisi Məhəmməd Abdullayevlə əlaqə saxladıq. O bildirib ki, avtovağzalda bir neçə kassa var və orada bilet satırlar: "Sürücünün ixtiyarı yoxdur ki, sərnişindən əlavə vəsait tələb etsin. Əgər belə bir fakt varsa, biz məsələni araşdırmağa hazırıq. Qoyun həmin narazı sərnişinlər yazılı şəkildə avtovağzal rəhbərliyinə müraciət etsin və biz araşdırma aparaq", - o əlavə edib. /Milli.az/