Məlum həqiqətdir ki, bu gün bazarlarda bir sıra məhşur brend markların saxtaları satılır. Bu isə birbaşa istehlakçı hüququnun pozulması və brend firmaların işgüzar nüfuzuna xələl gəlməsi deməkdir. Məsələyə münasibət bildirən İqtisadi İnkişaf Nazirliyinin ictimaiyyətlə əlaqələr şöbəsinin rəisi Abbas Əliyev məşhur brend malların saxtalaşdırılmasına dair Mövqe.az-a açıqlamasında qeyd edib : "O cür hallar əmtəə nişanının təqlid olunmasıdır. 2012-ci ildə İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarını Müdafiəsi Dövlət Xidmətinə daxil olunmuş müraciətlər əsasında aparılmış yoxlamalar zamanı 10 halda əmtəə nişanının təqlidi aydınlaşdırılıb. Bunlar paltar və parfümeriya məhsullarının əmtəə nişanlarının təqlidi olub. Bu il daxil olunmuş müraciətlər əsasında aparılan yoxlamalar zamanı 3 təsərrüfat obyektində parfümeriya və əl çantalarının əmtəə nişanlarının təqlidi hallarına görə müraciət olunub, tərəfimizdən indi araşdırma aparılır. Bu kimi başqa problemlərə görə isə müraciətlər olmayıb. Ötən il brend şirkətlərin müraciətləri əsasında aparılan araşdırmalar zamanı 10 hal üzrə əmtəə nişanının təqlidi aşkarlanıb və müvafiq tədbirlər görülüb.
Əgər belə hallarla istehlakçılar qarşılaşarlarsa 012 498 15 01 və yaxud da ki, 012 498 15 04 nömrəsinə zəng və yaxud da bir başa nazirliyin 195 qaynar xəttinə müraciət edə bilərlər. Dövlət xidməti bu məsələləri araşdırmağa və lazimi tədbirləri görməyə hazırdır".
Azad İstehlakçılar Birliyinin sədri Eyyub Hüseynov brend malların saxtalaşdırılması barədə qeyd edib: "Bu problem bir çox ölkələrdə var. Azərbaycana gələn malların təxminən 1 həftəyə saxtaları meydana çıxır. Bunlara kontrafakt mallar da deyilir. Saxtalaşdırma ətriyyatlarda və parfumeriya sahəsində daha çox yayılıb. Holoqramlar da saxta malların qarşısını ala bilmir. Müasir texnikalardan istifadə etməklə, mükəmməl istehlakçı siyasəti təqdim etməklə, bazarı qorumaqla bunun qarşısını almaq olar. Müstəqil ekspertiza xidməti yaradılmalı və dövlət orqanlarının koordinasiya olunmuş faliyyəti olmalıdır. Malların sertifikatları göstərilməlidir. Sertifikatlar da mallara partiya – partiya ilə verilməlidir".
AİB-nin sədri saxta ilə brend malların fərqli cəhətlərini də açıqladı:
"Bu cür malların zahiri görünüşü eyni olsa da, keyfiyyəti çox fərqlidir. Bəzən saxta mal, brend malın öz qiymətindən də baha satılır. Alıcı ətriyyat alarkən onun üzərindəki tarixə, poliqrafiyasına fikir verməlidir. Yəni qutunun üzərindəki kağızın nazikliyi və qablaşdırılması düzgün olmalıdır. Brend malların etiketləri üzərində qabarıq əl ilə hiss olunan yazılar olur, saxtalarda isə belə bir şey olmur. Çünki o yazıların yazılması baha başa gəlir.
2012-ci ildə istehlakçılarin bizə olunan müraciətlərinin 10%-i saxta mallarla bağlı olmuşdur".
