Azərbaycanda ikimərtəbəli yollar olacaq?!
"Azərbaycanda ikimərtəbəli yolların tikintisi bəzi yerlərdə
mümkündür, amma bu xüsusi hesabat tələb edir". Bu sözləri
Movqe.az-a açıqlamasında Dövlət Şəhərsalma
və Arxitektura Komitəsinin Beynəlxalq əlaqələr və informasiya
şöbəsinin müdiri Cahangir Qocayev deyib. C. Qocayev bildirib ki,
avtomobil sıxlığı olan iri şəhərlərdə tıxacdan çıxış yolu kimi belə
yollar tikilsə də, paytaxt Bakıda ikimərtəbəli yolların tikintisi
şəhərin hər yerində mümkün deyil: "Əslində bizdə tunellərin
üstündən salınan yolları ikimərtəbə hesab etmək olar. Amma yolun
üstündə ikimərtəbəli yolların inşasını Bakıda reallaşdırmaq bir
qədər çətindir. Tikilsə belə bu yolların məsafəsi çox qısa olacaq.
Çünki, əvvəlcə buna yolların kənarındakı tikililər yerləşmə
baxımından imkan verməlidir. Əks halda ekoloji baxımdan bu problem
yarada bilər. Kiminsə pəncərəsinin qabağından ikinci yolu çəkmək də
düzgün olmaz. Bu zaman avtomobillərdən çıxan zəhərli qazlar
pəncərədən evlərə dolacaq. Ona görə, də ikimərtəbəli yollar inşa
edilərkən, hava axını nəzərə alınmalıdır. Ona görə də, ikimərtəbəli
yolların inşası xüsusi hesabat tələb edir".