İndi hamı kapitalist olmaq istəyir: müəllim də, həkim də, məmur da, şair də, dindar da... Ona görə ki, toplumun idealı puldur!
***
Sosializm quruluşunda da hamı kommunist olmağa can atırdı: müəllim də, həkim də, məmur da, şair də, dindar da... Ona görə ki, toplumun idealı kommunizm idi!
***
Olsun ki, feodalizm quruluşunda da hamı feodal olmaq istəyib, quruluşun tələb etdiyi ideallar uğrunda vuruşub.
***
Olsun ki, quldarlıq quruluşunda da hamı quldar olmaq istəyib, quldarlıq idealı uğrunda vuruşub.
***
Olsun ki, ibtidai icma quruluşunda da hamı icma başçısı olmaq istəyib, quruluşun idealları uğrunda vuruşub.
***
Bütün quruluşlar və toplumlar bir təbəqənin, sinifin o birisi üzərində ağalığından yaranıb.
***
İcma quruluşu – icma başçılarının icma üzərində ağalığı olub.
***
Quldarlıq quruluşu – quldarın qul üzərində ağalığı olub.
***
Feodalizm quruluşu – feodalın ona təhkimlilər üzərində ağalığı olub.
***
Sosializm quruluşu – dövlətin fərd üzərində ağalığı olub.
***
Kapitalizm quruluşu – varlının yoxsul üzərində ağalığıdır.
***
Quruluşlar dəyişib, ölüb – ağalıq–nökərlik dəyişməyib, ölməyib, yeni–yeni ağalar–nökərlər yaranıb.
***
Bəşərin elə çağı olmayıb ki, maddi bərabərlik istəməsin.
***
Bəşərin elə çağı olmayıb ki, ağalığa yenilməsin.
***
Maddi bərabərlik ideyası – ağalığın, təbəqəliyin ölümü olardı.
***
Ağalıq ölmək istəmir – ona görə insanlıq dirilmir.
***
Ağaların yönəltdiyi quruluşları, toplumları insani saya bilmərik.
***
Ağalıq–nökərlik, təbəqələşmə varsa – insanlıq yoxdur!
***
Bəşərin indiyəcən olan dönəmini, tarixini insanlıq yox, ağalıq-nökərlik tarixi saymalıyıq.
***
İnsanlar savaş istəmirlər, ədalətsizliklə barışmırlar, haqlarının tapdanmasına dözmürlər, ləyaqətli yaşam istəyirlər, korrupsiyaya qarşı çıxırlar – onlar yaşadıqları kapitalizm quruluşundan insanlıq umurlar, gözləyirlər.
***
Toplumun, quruluşun başçıları, ağaları kapitalistdirlər, yəni antiinsançıdırlar – onlardan insanlıq ummaq, gözləmək aldanışdır.
***
İnsanlıq hələ başlamayıb – ona görə ki, ağalıq ölməyib. Ağalıq öləndə – insanlıq başlayacaq!