Mənzil bazarında artıq uzun müddətdir ki, özünü göstərən problemlərdən biri də aldadılmış payçılarla bağlıdır. Aldadılmış vətəndaşları narahat edən odur ki, onlar fırıldaqçı tikinti şirkətlərinin rəhbərlərinə nə verdikləri pulları geri ala, nə də mənzil sahibi ola bilirlər

Analoji problem şimal qonşumuzda da özünü göstərir. Lakin indi Rusiyada aldadılmış payçılarla bağlı problemlərin həlli üçün əl atılan yollardan biri də, həmin payçıların pulu hesabına tikilən  binaların hərraca çıxarılması və nəticəndə əldə olunan vəsaitlərin aldanan şəxslərə ödənilməsidir.  İndi Rusiya təcrübəsinin ölkəmizdə də  tətbiqi məqsəduyğun hesab edilir. 

"Əmlak Bazarı İştirakçıları" İctimai Birliyinin eksperti Rövşən Talıbzadə Movqe.az-a məsələ ilə bağlı açıqlama verib: "Həm beynəlxalq təcrübəyə, həm də qonşu ölkələrin təcrübəsinə baxsaq, görərik ki, evlərin tikitisinə xüsusi nəzarət mexanizmi var. Belə ki, evlərin alıcılara satışı zamanı, onun tikilməsi üçün nəzarət xidməti tərəfindən müəyyən vaxt limiti qoyulur. Əgər tikinti verilən vaxtda başa çatdırılmazsa, bina sahibkarın əllindən alınaraq hərraca çıxarılır. Binanı alan digər şəxs tikintini davam etdirir. Bizdə də bu gün şəhərdə yarımçıq qalan tikililərə təsadüf etmək olur. Bununla bağlı alıcıların aldadılması halları da yaşanıb. Pul ödədiyi halda mənzili ona gəlib çatmayan kifayət qədər insan var. Belə halların qarşısının alınması üçün bizdə də sahibkarların qarşısına müəyyən vaxt qoyulmalıdır. Əgər bu vaxta kimi tikinti başa çatmasa, həmin yarım qalan binalar hərraca çıxarılmalı və bu binaları almaq istəyən investorlara güzəştlər edilməlidir. Lakin bizdə bu sahibkarın fəaliyyətinin məhdudlaşması hesab olunur deyə həyata keçirilmir. Amma tətbiq olunsa müsbət nəticələr əldə oluna bilər. Çünki bu problemdən həm mənzil sahibləri əziyyət çəkir, həm də digər tərəfdən yarım qalan binalar ətraf ərazilərdə yaşayan insanlar üçün təhlükə mənbəyidir. Tam hazır olmadığından orda erroziya prosesləri sürətlə gedir, həmin binalar aşınmağa başlayır. Bir tərəfdən isə bu yarımçıq tikililər həm də ki şəhərin görünüşü pozulur. Bu baxımdan tikintisi yarımçıq qalan binalarla bağlı bu kimi müəyyən adıımların atılması zəruridir".

Birliyin sədri Ramil Osmanlı da sözügedən təcrübənin ölkəmizdə tətbiqini dəstəklədiyini bildirib: "İstehlakçi hüquqlarının müdafiəsinə xidmət edən istənilən aksiya alqışalayiqdir və bunun Azərbaycanda tətbiqi mümkündür. Amma təəssüflər olsun ki, ölkəmizdə bu cür təşəbbüslər hələ ki, müşahidə olunmur".