Əli Məsimli: "Avtomobil alan şəxs maşının nə
qədər cəriməsinin olub-olmadığını yoxlamalıdır"
Bir sıra hallarda ikinci əl satılan avtomobil almaq istəyən şəxslərin rastlaşdığı problem əvvəlki sürücüdən qalma cərimələr olur. Bəzi sürücülər haqqını tələb edib, cəriməni səbəbkara ödədə bilsələr də, bir çoxu pulu özü ödəməyə məcbur olur. Müəyyən xarici ölkələrdə isə cərimə şəxsin adına deyil, avtomobilin nömrəsinə əsas göstərilməklə yazılır və yol polisinin rəsmi saytında bu barədə məlumat öz əksini tapır. Ölkəmizdə də bu təcrübənin tətbiq olunması labüd sayılır.
"Digesta" firmasının Direktoru, hüquqşünas
Ərşad Hüseynov Mövqe.az saytına təkliflə bağlı münasibətini
bildirib. Hüquqşünas deyib ki, əslində, bizdə bu həyata keçirilir.
Amma cərimə konkret şəxsin adına yazılır: "Məlumat da Dövlət Yol
Polisinin informasiya bazasında qeyd olunur. Orda avtomobil
sahibi, eyni zamanda avtomobilin markası, rəngi, nömrəsi və s.
hamısı öz əksini tapır. Yaxşı olardı ki, avtomobil satışı zamanı o,
qanunvericiliklə başqasının adına keçiriləndə bu xüsusiyyətlər də
yoxlanılsın. Yaxud da şəxs informasiya sisteminə girə bilib öyrənə
bilsin ki, avtomobilin əvvəlki sahibi hansı qayda pozunutusuna yol
verib, nə qədər cərimə ödəyib, ödəyəcəyi cərimə qalıbmı və s.
Amma indi insanların çoxu maşını etibarnamə ilə alır, digər
məsələlərlə heç maraqlanmırlar da. Bu sahədə maarifləndirmə işləri
də aparılmalıdır".
Ə.Hüseynov cərimələr haqda məlumatların hamıya açıq olması ideyasını müsbər qarşılayır: "Hal-hazırda Dövlət Yol Polisinin rəsmi saytında cərimələr haqda məlumatlar var. Lakin burda hər kəs öz adına olan məlumata baxa bilər. Bu məlumatların hamıya açıq olması çox müsbət ideya olardı. Buna əsasən, hansı avtomobilin nə qədər cəriməli olması bilinərdi. Avtomobili almaq istəyən şəxs də sadəcə nömrəni yazmaqla onun haqda məlumatları əldə edərdi".
Bu gün əksər sürücülərin
avtomobili etibarnamə ilə aldıqlarını deyən Daxili İşlər Nazirliyi
Respublika Baş Dövlət Yol Polisi İdarəsi İctimaiyyətlə əlaqələr
şöbəsinin rəisi, polis polkovniki Kamran Əliyev isə problemin
bununla əlaqədar yarandığını dedi: "Məsələ bundan ibarətdir ki,
insanlar avtomobili rəsmi şəkildə almırlar. Sadəcə, etibarnamə ilə
avtomobili əldə edirlər. Etibarnamə nəqliyyat vasitəsinin başqa
şəxsə satılmasını bildirən sənəd deyil. Ona görə də, avtomobili
alan şəxs rəsmi olaraq öz hesabına keçirməlidir. Hesabına
keçirəndən sonra, ondan əvvəl nə cərimə vardısa, bu, ona aid
olmayacaq. Amma etibarnamə ilə avtomobil əldə edəndə, ödənilməyən
cəriməyə görə 2 aydan sonra avtomobilin hərəkətinin dayandırılması
haqda qərar qəbul olunur. Və cərimə ödənməmiş nəqliyyat vasitəsi
buraxılmır. Amma rəsmi alqı-satqı zamanı maşın haqda bütün
məlumatlar üzə çıxır və həmin vətəndaşlar öz aralarında mübahisəli
məsələni həll etməyə çalışırlar".
Milli Məclisin deputatı, iqtisadçı
Əli Məsimlinin də münasibətini öyrəndik: "Avtomobil sahibi qayda
pozuntusu edirsə, o, ya radara düşür, ya da ki birbaşa
cərimələnir. Və cərimələnərkən artıq bu haqda məlumat
informasiya bazasında yerləşdirilir. Sadəcə, avtomobil alan
diqqətli olmalıdır. Necə ki, avtomobilin texniki vəziyyətini
öyrənmək üçün yoxlamadan keçirirlər, eləcə də həmin formada nə
qədər cəriməsinin olub-olmamasını yoxlasınlar. Bu məsələdə diqqətli
olmaq lazımdır".