Ölkəyə gətirilən avtomobillərin gündən-günə artdığı bir şəraitdə, bunun ekologiyaya təsirinin böyüməsi də qaçılmaz sayılır. Özü də ölkədə avtomobillərin sayı durmadan artır və qarşıdak dövr ərzindədə artımın davam etməsi gözlənir. Xatırladaq ki, avtomobillərin ekologiyaya vurduğu zərərin minimum həddə salınması üçün ölkədə "avro 4" standartının təbiqinə start verilib. Eyni zamanda istər dövlət qurumları, istər könüllülər, istərsə də yaşılsevərlər tərəfindən şəhərdə yaşıllaşdırma sahəsində müəyyən işlər görülür. Lakin avtomobil idxalının artması fonunda görülən işlərin ekoloji durumu tam yaxşılaşdırmağa kifayət etməsi mümkün deyil. Ekoloqların sözlərinə görə, yeni salınan ağaclar bəhrəsini yalnız 15-20 il sonra verə bilərlər.
Yaşıllar Hərəkatının sədri Fəridə Hüseynova Movqe.az-a açıqlamasında bildirir: "Bu gün Azərbaycanda istismarda olan avtomobillərin çoxu təmirdən çıxan, lakin köhnə avtomobillərdir. Bunlar adətən, xaricdən gətirilən ikinci əl avtomobillər olur. Yeni istehsal olunan maşınlar baha olur deyə, köhnə maşınları əhali büdcəsinə daha çox uyğun görür. Amma nəzərə almaq lazmdır ki, xarici ölkələr bu avtomobilləri ona görə bizə satırlar ki, onların filtrləri havaya atılan tullantıları təmizləyə bilmir. Onu dəyişdirmək isə çox baha başa gəlir. Bu halda onlar maşını satıb yenisini almağı üstün bilirlər. Bizimkilər isə, onları alıb ölkəyə gətirirlər. Çünki, bizdə qaydalar hələ lap kəskin deyil ki, onların qabağını alsın. Bu səbəblərdən havaya daha çox tullantı atılmış olur.
Eyni zamanda baxmayaraq ki, yaşıllıq işləri zamanı yeni, balaca şitilləri əkirlər. Bir tərəfdən onların ümumiyyətlə, tutma ehtimalı da müəmmalıdır ki, böyüyəcək ya böyüməyəcək. Digər tərəfdən onlar balaca olduğundan, yarpağının sayı da azdır. Yəni onun yarpağının ixrac qabiliyyəti də daha azdır, nəinki böyük ağacın. Yalnız 15-20 ildən sonra yeni əkilənlər əvvəlki, kəsilmiş ağacların ölçüsünə gəlib çatanda kifayət qədər oksigen ixrac edə biləcəklər. Təəssüflər olsun ki, bu gün bizim yaşıllaşdırma idarələrində hərdən elə adamlar çalışır ki, insan təəccüblənir. Görürsən ki, eyni ağacı bir ildən, iki ildən sonra kəsib budayırlar, yarpaqları da azalır. Onu cavanlaşdırmaq adı ilə eləsələr də, ətraf mühit üçün, hava üçün bunun əhəmiyyəti yoxdur. Əksinə, oksigenin miqdarı azalır".
Milli Ekoloji Proqnozlaşdırma Mərkəzinin
rəhbəri Telman Zeynalov da deyir ki, yeni əkilən ağaclara hələ 7-8
il qulluq eləmək lazımdır ki, ondan sonra çirkli havanı təmizləyə
bilsin: "Avtomobillərin havaya atdıqları istər dəmyə qazı, istərsə
də digər zərərverici qazlar yaşıllıqları məhv edir, onların
inkişafına mane olur. Çünki yaşıldıqlar karbon qazını
mənimsəyirlər. Maşınlar isə karbon qazından savayı, bir sıra
tullantılar da atırlar ki, onlar bitkini zəhərləyir. Təzə əkilən
cavan, gənc yaşıllıqlar o çirkli havanı mənimsəməyə qadir deyillər.
Gücləri çatmır. Onlar təzə əkilən ağaclar olduğuna görə hələ ilk
öncə 7-8 il qulluq eləmək lazımdır ki, sonra onlar da havanı
təmizləyə bilsin. Bu gün şəhərdə 200 min hektara qədər yaşıllıq
salınıb. Xüsusən yol kənarlarında yaşıllıqlar salınb. Onlara qulluq
da olunur. Sadəcə olaraq, boya-başa çatandan sonra üzərlərinə düşən
öhdəlikləri layiqincə yerinə yetirəcəklər. Meqopolis gündən-günə
böyüyür, insanların, maşınların sayı getdikcə artır. Nəhəng binalar
küləyin əsməsinə mane olurlar. Havanın təmizlənməsində təkcə
yaşıllıqlar deyil, küləklər də mühüm rol oynayır. Əvvəllər həftə
sonları dənizə getmək olmurdu. Cümə günündən başlayan külək iki gün
davam edirdi. İndi tamamilə başqa cürdür. İndi tikilən hündür
binalara görə, küləyin istiqaməti də dəyişib. Şəhərə külək daxil
olmur. Nəticədə avtomobillərin buraxdığı tullantılar havada asılı
qalır".