Bakı küçələrində dilənməklə məşğul olan azyaşlı uşaqlara hələ də rast gəlmək mümkündür. Qışın soyuğu, yayın istisi demədən dilənən bu uşaqların taleyi ciddi narahatlıq doğurur. Araşdırmalar nəticəsində məlum olub ki, bir çox hallarda bu uşaqları dilənçiliyə vadar edən elə öz valideynləri olur. Avropa ölkələrinin bir çoxunda uşaq əməyindən istifadəyə görə, hətta valideynlikdən məhrumetməyə qədər cəzalar mövcuddur. Bundan başqa, həmin uşaqları məcburi əməkdən qurtarmaq üçün onların ailələrinə dövlət tərəfindən xüsusi yardımların verilməsi də mümkündür.  Bizdə də bu cür cəza tədbirlərinin görülməsi bəlkə də problemin həllinə çarə olardı.

Uşaq Hüquqları Liqasının sədri Yusif Bəkirov hesab edir ki, uşaqları diləndirilməsi hallarının qarşısını birdəfəlik almaq mümkün deyil: "Bu uşaqların dilənçilik eləməsi sosial vəziyyətin ağır olmasından irəli gəlir. İnsanların yaşam şəraiti o qədər yaxşı olmalıdır ki, hamı işləsin və uşaqları dilənçilik eləməyə vadar eləməsin. Çünki dilənən uşaqlarının əsasən məqsədi ailəsini dolandırmaq olur. Məsələyə inzibati müdaxilə kimi uşaqlarını diləndirən valideynləri cəzalandırmaq da olar, onları valideynlik hüququndan məhrum eləmək də. Lakin bu zaman başqa bir problem ortaya çıxacaq. Bu zaman uşaqlar internatlara yerləşdiriləcək və ailədən tamamən məhrum olacaqlar. İndilikdə isə belə bir hal qəbul olunmayıb ki, dilənçiliyə görə, valideyn hüququ əlindən alınsın. Əgər belə olsa, dövlət özü həmin uşaqları himayəyə götürməli olacaq. Göründüyü kimi, bunlar hamısı zəncirvari şəkildə problemlərin yaranmasına gətirib çıxarır". 

Hüquqşünas Səməd Vəkilov isə deyir ki, küçədə dilənən uşaqların əksəriyyəti valideynsiz uşaqlar olurlar: "Əgər valideyn uşağı dilənməyə vadar edirsə, o zaman valideyni qanunla müəyyən edilmiş borclarının yerinə yetirmədiyinə görə cəzalandırmaq lazımdır. Çünki hər bir valideynin borcudur ki, uşağı yetkinlik yaşına çatana qədər ona baxsın. Dilənməyə vadar edirsə, bu borcunu yerinə yetirmir. 

Qalan uşaqlar isə dövlətin himayəsinə verilməlidir.  Bu kimi uşaqlara nəzarətlə birbaşa Daxili Işlər Nazirliyi məşğul olur. Onlar belə uşaqları müəyyən edib araşdırırlar. Hökümətin bu işdə marağı var və işlər görülür".