AMEA-nın Əlyazmalar İnstitutunun əməkdaşı Əkrəm Həsənovun sosial şəbəkələrdə Yerin fırlanması ilə bağlı paylaşdığı fikirlər mübahisə predmetinə çevrilib.
Movqe.Az kulis.az-a istinadən bildirir ki, Əkrəm Həsənov bunları deyib:
"Mən islam alimlərindən heç birinin əsərində Yer kürəsinin fırlanmasına rast gəlməmişəm. Əksinə, böyük islam alimlərindən bəziləri, xüsusi ilə sələfi alimləri və müasir bəzi alimlərdən bəziləri də Yer kürəsinin fırlanmamasını deyiblər.
Yer kürəsinə Allah-təala bir vəzifə verib, o da öz vəzifəsini itaətkarlıqla icra edir. Amma onun özünün buna gücü çatmaz. Onu hərəkət etdirən uca Allahdır. Yuxarıda da qeyd etdiyim kimi, bəzi sələfi alimləri Yerin fırlanmadığını deyiblər. Amma elm Allaha aid olduğu üçün, zamanla elmi kəşflər də ortaya çıxdığı üçün, Yerin fırlanması elmi nəzəri dəlillərlə sübut olunmuşdur. Təzədən bu mövzuda təqlidçiliyə baş qoşmağın mənası ola bilməz.
Mənə iki-üç gün ərzində bu barədə yüzlərlə suallar gəlib. Yer elmə əsasən fırlanır. Amma sələfi alimlərinin bəziləri fırlanmır deyirlər. İndi təqlid yolunumu tutaq, yoxsa uca Allahın bəşər övladına verdiyi elmi əsas götürək. Mən Allah elm sahibi olduğu üçün cavabı Ona həvalə edirəm. Çünki dəqiq cavabı mən də bilmirəm. Həmçinin bunun elmi sübutu olduğu üçün mən onun fırlanmasının daha doğru olduğu qənaətindəyəm.
Buna baxmayaraq Yer kürəsinin fırlanması məsələsində bəzi şübhəli məqamlar vardır. Dünyanın elə hündür yerləri vardır, misal üçün Norveçdə, üç ay müddətinə qədər Günəş batmır. Əgər Yer kürəsi fırlansaydı, Günəş batardı. Deməli, anlamalıyıq ki, bizə verilən dünyəvi məlumatlar elmi də olsa belə bunu sübut edən böyük dəlillərə ehtiyacımız vardır. Həmçinin 6 ay gündüz və 6 ay gecə olan ölkələr var. Bəs Yer kürəsi necə fırlanır ki, həmin bölgələrdə gecə və gündüz 6 ay davam edir. Belə çıxır ki, həmin ölkədə Yer kürəsi 6 ay fırlanmır? Buna görə də biz unutmamalıyıq ki, hər oxuduqlarımız, elm olaraq anladıqlarımız da hələ bizə qaranlıqdır. Düşünürəm ki, bu müzakirələrin müsbət elmi tərəfini ortaya qoyacaq elmi kəşflər hələ qabaqdadır".
