Bu gün Binəqədi Rayon İcra Hakimiyyəti və
Binəqədi rayon bələdiyyəsi tərəfindən Goradil bağlar massivində
yerləşən 2 saylı Evtikmə Kombinatının istirahət zonasında
məskunlaşmış Xocalıdan olan şəhid ailələri və məcburi köçkünlərlə
görüş keçirildi. Görüş zamanı Xocalı
soyqırımı zamanı şəhid olmuş insanların ailələrinə Binəqədi Rayon
İcra Hakimiyyəti rəhbərliyinin başsağlığı çatdırıldı. Sakinlərin
problemi dinlənildi, onları narahat edən məsələlərin həlli ilə
bağlı tədbirlərin görüləcəyi bildirildi. Xocalı soyqırımında həm fiziki, həm də mənəvi terrora məruz
qalmış insanlarla görüş zamanı onlar mütəmadi olaraq dövlət qayğısı
ilə əhatə olunduqlarını qeyd etdilər. Məcburi köçkünlər erməni
qəsbkarlarının törətdiyi bu soyqırıma məhz Ulu Öndər Heydər Əliyev
tərəfindən hüquqi-siyasi qiymət verildiyini vurğuladılar.
Xocalılılar onlara göstərilən diqqət və qayğıya, maddi və mənəvi
dəstəyə görə dövlət başçısı cənab İlham Əliyevə öz
minnətdarlıqlarını bildirdilər.
Sonda Rayon İcra Hakimiyyəti və Binəqədi rayon
bələdiyyəsi tərəfindən Xocalıdan olan şəhid və məcburi köçkün
ailələrinə humanitar yardım göstərildi.