Böyük Britaniya kraliçası II Yelizaveta və onun ailəsinin digər üzvlərinə sui-qəsd planlaşdıran 2 "İŞİD" silahlısı Suriyada məhv edilib.

Movqe.az xəbər verir ki, bu barədə "The Telegraph" qəzeti xüsusi xidmət orqanlarındakı mənbəyə istinadən məlumat yayıb.

Böyük Britaniya vətəndaşları olan Reyad Xan və Cüneyd Hüseynin Londonda Yaponiya üzərində qələbənin 70 illiyinə həsr olunmuş tədbirlərdə partlayış törətmək niyyətlərinin öyrənilməsindən sonra onların zərərsizləşdirilməsinə qərar verilib. Avqustun 14-də Uaythollda keçirilən mərasimə kraliça II Yelizaveta, şahzadə Çarlz və kral ailəsinin digər üzvləri qatılıb. Bildirilir ki, R. Xan Britaniyada 8 mayda keçirilən Avropa Qələbə Günü və iyunun sonlarında keçirilən Silahlı Qüvvələr Günündə də terror aktı törətməyi planlaşdırıb. Kardiff sakini olan R. Xan Britaniya pilotsuz təyyarəsinin zərbələri, Birmingem sakini, 21 yaşlı C. Huseyn isə Amerika pilotsuz təyyarəsinin zərbələri nəticəsində məhv edilib.

"The Telegraph" R. Xanın "İŞİD" sıralarına qoşulmazdan öncə Britaniya universitetlərindən birində təhsil aldığını yazıb. C. Hüseyn isə 2012-ci ildə Böyük Britaniyanın sabiq baş naziri Toni Bleyrin şəxsi "Twitter" hesabını dağıtdığı üçün mühakimə edilib. C. Hüseynin "Kiberxilafət" adlanan hakerlər qrupuna daxil olduğu, bir neçə fransız saytlarının, ABŞ Mərkəzi Komandanlığının, "Newsweek", "İnternational Business Times" nəşrlərinin saytlarına müdaxilə etdiyi də məlum olub.

Qeyd edək ki, sentyabrın 7-də parlamentdə keçirilən dinləmələrdə Böyük Britaniya baş naziri Devid KemeronSuriyada bir neçə britaniyalı "İŞİD" silahlısının məhv edildiyi barədə məlumat verib.