Movqe.az xəbər verir ki, Masallı Rayon  İcra Hakimiyyəti  başçısının sərəncamına əsasən Xocalı soyqırımının 24-cü ildönümünün keçirilməsi ilə bağlı tədbirlər planı təsdiq olunmuşdur. Tədbirlər planında fevralın 22-26-sı günlərində, saat 10-da Heydər Əliyev Mərkəzinin 3D kinozalında Masallı Rayon İcra Hakimiyyəti və Mərkəzin birgə təşkilatçılığı ilə əlaqədar Elxan Cəfərovun "Dolu" filmi təqdim ediləcəkdir.Film ilk dəfə 2013-cü ildə Masallı sakinlərinə şəhər mədəniyyət evində təqdim olunmuşdu. Həmin gün filmin yaradıcı kollektivi ilə görüş keçirilmiş, film haqqında rəylər söylənilmiş və məziyyətləri qiymətləndirilmişdir.Masallı Rayon İcra Hakimiyyətinin başçısı Rafil Hüseynov filmin yaradıcılarına uğurlar arzulayıb dedi:"Bu hadisələri o vaxt yaşamış bir insan kimi deyirəm ki, hər şey reallığın təcəssümüdür, bədii cəhətdən reallığı əks etdirir. Bir sözlə film alınıb. Bu təkcə vətənpərvərlik filmi deyil, həm də vətən filmidir.Yaşadığımız ay qürur ayıdır. Bu film də gənclərdə qürur hissi aşılayır, vətən yolunda döyüşmək, torpaqlarımızı qorumaq, bu yolda şəhidlik zirvəsinə yüksəlmək qürur və iftixardır. Bu qüruru Masallılar 5 Milli Qəhrəmanımıza, 200-dən argtıq şəhidlərimizə görə yaşayırlar. Bu bizim qəhrəmanlıq salnaməmizdir. Qarabağda döyüşən qəhrəmanların birinin burada iştirakı da bizi sevindirir".Qeyd edək ki, "Dolu" — Elxan Cəfərov tərəfindən 2012-ci ildə çəkilən Azərbaycan tammetrajlı bədii filmidir. Film Qarabağ müharibəsində Vətən uğrunda son nəfəsinə qədər döyüşən Azərbaycan oğullarının qəhrəmanlığından bəhs edir. Qarabağ müharibəsi mövzusunda istedadlı qələm ustası, Azərbaycan Respublikası Milli Məclisinin deputatı, Azərbaycanın əməkdar jurnalisti, 1986-cı ildən Azərbaycan Yazıçılar İttifaqının üzvü, Azərbaycan komsomolu mükafatı laureatı (1987) ("Ən yaxşı adam" kitabına görə), Azərbaycan Jurnalistlər Birliyinin "Qızıl qələm" mükafatı laureatı (1993), "Məmməd Araz" adına ədəbi mükafat laureatı (1994), "Dan ulduzu" (1993), "Yaddaş" və "Zeynalabdin Tağıyev" mükafatları laureatı Aqil Abbasın eyniadlı romanı əsasında "Azərbaycanfilm" kinostudiyasında çəkilmişdir.Filmin rejissoru Elxan Cəfərov, ssenari müəllifi Aqil Abbas, operatoru Nadir Mehdiyev, rəssamı Rafiq Nəsirov, bəstəkarı Xalq Artisti Polad Bülbüloğlu, icraçı prodüseri Nadir Əliyevdir.Ekran əsərində əsas rollarda Məmməd Səfa, Rza Rzayev, Elvin Əhmədov, Fuad Poladov, Fərhad İsrafilov və başqaları çəkilmişlər.Filmin çəkilişləri İsmayıllı, Şəmkir, Ağdam və Ağcabədi rayonlarında aparılmışdır.2013-ci ildə Bakıda Mədəniyyət və Turizm Nazirliyinin teatr, musiqi, təsviri sənət və kino sahəsində təsis etdiyi "Zirvə" mükafatının 6-cı təqdimetmə mərasimində "Dolu"nun yaradıcı heyətinə "Zirvə" mükafatı verilmişdir.Film Azərbaycanla yanaşı, Rusiyada da nümayiş etdirilərək geniş tamaşaçı marağına səbəb olmuşdur.