Məlumdur ki, ayr-ayrı ölkələr istismar müddəti bitmiş nəqliyyat vasitələrinin utilizasiyasını müxtəlif üsullarla həyata keçirirlər. Məsələn, Fransa, Polşa, Almaniya, Yaponiyada, o cümlədən qonşu Rusiyada atılmış avtomobillərin sürücüləri nəqliyyat vasitələrinə sahib çıxmadıqda cərimə olunurlar. Ancaq oxşar mənzərə ilə ölkəmizdə üzləşsək də, analoji cərimələr tətbiq olmur.
Qeyd edək ki, bu yaxınlarda Baş Dövlət Yol Polis İdarəsinin
ictimaiyyətlə əlaqələr şöbəsinin rəisi, polis polkovniki Kamran
Əliyev Azərbaycanda 10-15 ildir cərimə meydançasında “yatan”
avtomobillərin olduğunu bildirmişdi. Bundan başqa bəzi yol
kənarlarında, məhəllə daxillərində də istismar müddəti bitmiş
nəqliyyat vasitələrinə rast gəlmək mümkündür. Onlar isə hərəkətə
maneçilik törətməklə yanaşı, digər problemlərə də səbəb ola
bilirlər. Bu baxımdan mütəxəssislər oxşar cərimə metodlarının
ölkəmizdə tətbiq olunmasının tərəfdarıdırlar.
Nəqliyyat məsələləri üzrə ekspert Azər Allahverənov da ölkə
ərazisində bu cür nəqliyyat vasitələrinə tez-tez rast gəlindiyi
təsdiqləyir: “Amma həmin maşınların əksəriyyətinin hüquqi baxımdan
sahibləri var. Problemin həllində ən optimal variant o ola bilərdi
ki, sahibləri istismar müddəti bitmiş avtomobillərini utilizasiyaya
təhvil versinlər. Bunun müqabilində hətta müəyyən qədər maliyyə
əldə edə bilərlər. Ancaq hazırda görünən odur ki, dediklərimiz baş
vermir. Sanki, sürücülər bu kimi məsələləri özlərinin öhdəliyi
hesab etmirlər. Ona görə də problemin məsuliyyətini daşımırlar. Ən
yaxşı halda avtomobili köhnə olduğuna görə harasa atır.
Bəzi icra qurumlarının bu məsələ ilə bağlı işə başlamaq fikirləri
var. Amma ilkin olaraq prosesinin hüquqi tərəfləri həll
edilməlidir. Çünki, nəqliyyat vasitəsi atılmış vəziyyətdə olsa da,
hüquqi baxımdan reyesterdə kiminsə əmlakı kimi qeydiyyatdadır. O
baxımdan hansısa qurum maşını götürərsə, sahibi tərəfindən
günahlandırıla bilər. Ona görə də belə problem yaranmasın deyə, işə
baş qoşulmur. Amma istismar müddəti bitimiş avtomobillər
küçərlərdən yığışdırılmalıdır. Çünki, o cür nəqliyyat vasitələri
yer tutur, müəyyən problemlər yaradır. Hətta o maşınlardan kriminal
məqsədlər üçün də istifadə oluna bilər. İlkin olaraq hər bir o cür
nəqliyayt vasitəsinin sahibi müəyyən edilməlidir. Dövlətə bu kimi
məsələnin həlli ilə bağlı əlavə səlahiyyət verilməlidir.
Qanunvercilikdə müəyyən dəyişikliklər edilməlidir. Utilizasiya ilə
bağlı dövlət proqramının qəbulu istiqamətində müəyyən işlər
görülür. Lakin maşınqayırma sənayesi ağır prosesdir. Hələlik bu
problem insanların öhdəliyinə buraxılıb”.
“Nəqliyyat Təhlükəsizliyi” Araşdırmaları və Tədqiqatlar Mərkəzinin
rəhbəri İlqar Hüseynli bildirdi ki, xaricdə cərimə praktikası
mövcuddur: “Atılmış nəqliyyat vasitələri illərlə qaldıqda onun
sahibi müəyyənləşdirilir və müvafiq tədbirlər görülür. Amma cərimə
tətbiq edilməmişdən əvvəl ona xəbərdarlıq edilir.
Nəqliyyat vasitəsinin utilizasiyası üçün sahibi bütün hüquqi
proseslərdən keçməlidir. Xəbərdarlığa heç bir reaksiya olmadıqda
sahibi cərimələnir və həmin nəqliyyat vasitəsi istismar müddətinin
başa çatması ilə bağlı aktlaşdırılır. «Metallom»a və ya təkrar
istehsal üçün müvafiq sexlərə təhvil verilir”.
Ekspertin sözlərinə görə, Azərbaycanda da eyni cür qaydanı tətbiq
etmək olar: “Amma nəzərə alaq ki, ölkəmizdə o cür nəqliyyat
vasitələrinin sayı çox deyil. İnsanlar bir nəqliyyat vasitəsindən
illərlə istifadə etməyə üstünlük verirlər. Yeni nəqliyyat
vasitələrinin alınmasında o qədər də maraqlı deyillər. Ancaq
hansısa ərazidə atılmış halda nəqliyyat vasitəsi varsa və maneçilik
yaradırsa, müvafiq qurumlar onun sahibinin müəyyənlədirilməsi
istiqamətində işlər həyata keçirməlidirlər. Qaydalara müvafiq
olaraq əvvəlcə xəbərdarlıq edilməli, sonra isə daha ağırlaşdırıcı
tədbirlər həyata keçirməlidirlər. Cərimələrdən sonra nəqliyyat
vasitəsini «metallom»a təqdim etmək olar”.
Mübariz BAYRAMOV