Məktəblərdə suçiçəyi və qızılca xəstəliklərinin yayılmasına aydınlıq gətirildi
İbadulla Ağayev: "Bakı məktəblərində suçiçəyi və qızılca xəstəliklərinin yayılmasında orta məktəblərin tibb məntəqələrinin həkimləri günahkardır"
"Bakı məktəblərində suçiçəyi və qızılca xəstəliklərinin
yayılmasında orta məktəblərin tibb məntəqələrinin həkimləri
günahkardır. Bu xəstəliklərin yayılması epidemiya halını almayıb.
Sadəcə olaraq suçiçəyi və qızılca xəstəliklərinə yoluxan bir-iki
nəfərin dərsə gəlməsi bu xəstəliklərə yoluxanların sayını artırıb".
Bu sözləri Movqe.az-a açıqlamasında ölkənin baş epidemioloqu
İbadulla Ağayev söyləyib. Onun sözlərinə görə, orta məktəblərdəki
tibb məntəqələrinin həkimləri bu məsələlərdə diqqətli olmalıdırlar:
"Suçiçəyi və qızılca xəstəlikləri infeksion xəstəliklərdir. Ailədə
bir uşaq bu xəstəliyə yoluxursa, digər uşaqları qorumaq üçün
tədbirlər görülür. Suçiçəyi və qızılca xəstəliklərinə yoluxan
uşaqlar dərsə dəvamiyyətlərini davam etdirə bilməzlər. Bəzən
valideynlər uşaqda bu xəstəliklərin hansısa birinin olmasına dəqiq
diaqnoz qoya bilmirlər. Amma məktəblərdə tibb məntəqələri var ki,
onların həkimləri ayıq-sayıq olmalıdırlar. Uşaqlar arasında bu
xəstəliklərin yayılmaması üçün dərhal həmin infeksion
xəstəliklərdən birinə yoluxan uşaq məktəbdən çıxarılmalı, tam
sağalanadək təhsil müəssisəsinə buraxılmamalıdır".