"Dərsliklər çap edilməzdən öncə müzakirə üçün dərslik üzrə bütün ekspertlərə paylanıla bilməz. Bu qaydalara ziddir. Axı həmin əlyazmalar kodlaşdırılaraq Dərsliklərin Qiymətləndirilməsi Şurasına təqdim olunur. Əvvəlcədən müzkirə aparsaq bu məxfiliyi qorumaq olmayacaq".
Bu sözləri Movqe.az-a açıqlamasında Dərslik və nəşriyyat şöbəsinin müdiri Faiq Şahbazlı söyləyib: "Hazırda dərsliklərin monitorinqi aparılır. Ona görə də istəməzdim ki, mənim dərsliklərin müzakirəsi ilə bağlı səsləndirdiyim hər hansı fikir ekspertlər tərəfindən narazılığa səbəb olsun. Amma mən bəyan edirəm ki, dərslikləri çapa buraxmazdan öncə müzakirəsini aparmaq praktiki baxımdan mümkün deyil.  Çünki tender komissiyasının iclası zamanı təkliflər açılır. Kodlaşdırılaraq Şuranın rəhbərliyinə təqdim olunur. Sonra Şura hər fənn üzrə ayrı ekspert qrupu yaradır. O qrupda həmin fənn üzrə qabaqcıl müəllimlər alimlər cəlb olunur. Müəyyən müddətə onlar dərsliklərə baxıb qiymət verirlər. Sonra həmin qiymətləndirmənin nəticələri Şura rəhbərliyinə verilir. Şura rəhbərliyi nəticəni tender komissiyasına açıqlayır. Dərsliklərin ayrı-ayrı ekspertlər tərəfindən qiymətləndirilməsinə vaxt qalmır. Çünki komissiyanın qərarından sonra dərsliyin çapına başlanır ki, yeni dərs ilinə qədər dərsliklər hazır olsun".