"İnternet klublarda uşaqların zərərli informasiya almasının qarşısını almaq üçün nəzarətin gücləndirilməsi məqsədi ilə qanunvericiliyə əlavələr edilə bilər. Bizim Komitə tərəfindən artıq bununla bağlı təkliflər hazırlanıb". Bu sözləri Movqe.az-a Ailə, Qadın və Uşaq Problemləri üzrə Dövlət Komitəsinin Uşaq problemləri şöbəsinin rəhbəri Cəmilə Bağırova verib. Onun sözlərinə görə, hazırda uşaqlara internet klublarda süzgəcdən keçirilməyən internet xidməti göstərilir: "Uşaqların internet təhlükəsizliyi ilə bağlı problem həll olunmalıdır. İndi internet klublarda uşaqların yaş kateqoriyasına məhəl qoyulmadan internet xidməti göstərilir. Biz təkliflər hazırlamışıq ki, qanunvericiliyə bununla bağlı əlavələr olunsun. İnternet klublara nəzarətlə bağlı qanunvericiliyə əlavələr olunmalı, bu barədə İnzibati Xətalar Məcəlləsində müddəalar öz əksini tapmalıdır".