""Bakı körfəzi dəniz körpüsü" layihəsi yeraltı tunellə əvəzlənməsi dəqiqləşib". Dövlət Şəhərsalma və Arxitektura Komitəsinin şöbə müdiri Cahangir Qocayevin Movqe.az-a verdiyi məlumata görə, bu körpünün inşası Bakı buxtasına açılan panoramanın qarşısını kəsdiyindən, eyni zamanda səmərəli olmadığından inşası məqsədəuyğun sayılmayıb: "Azərbaycan Memarlar İttifaqı və Dövlət Şəhərsalma və Arxitektura Komitəsi Xəzər dənizi üzərindən avtomobil körpüsünün salınması layihəsini məqsədəuyğun saymadı. Bakı buxtası üzərindən salınaraq Bayıl qəsəbəsi ilə Zığ qəsəbələrinin birləşdirilməsini nəzərdə tutan bu körpünün inşası layihəsi Azərbaycan Memarlar İttifaqının Şəhərsalma Şurasında ölkənin tanınmış memarları və Dövlət Şəhərsalma və Arxitektura Komitəsinin mütəxəssislərinin iştirakı ilə müzakirə edildi. Mütəxəssislər bu layihənin gözlənilən qədər effektiv və səmərəli olmayacağını, ən əsası Bakının inkişaf konsepsiyasına uyğun gəlmədiyini bildiriblər. Mütəxəssislərin gəldiyi qənaətə görə, körpüyə daxil olan nəqliyyat vasitəsi onun sonunadək çatmamış oradan çıxa bilməyəcək ki, bu da avtomobil sahibləri üçün narahatlığın yaranması deməkdir. İkincisi, bu körpüdən istifadə hava şəraitindən asılı olacaq. Belə ki, körpü yalnız o vaxt istifadə oluna bilər ki, küləyin sürəti saniyədə 20 metrdən çox olmasın. Bakı buxtasında isə ayda bir neçə gün küləyin sürəti bundan artıq olur. Üçüncü səbəb körpünün Bayılı Zığ qəsəbəsi ilə birləşdirməsidir, halbuki Bakının Zığ istiqamətində deyil, əksinə, qərb tərəfə inkişaf etdirilməsi nəzərdə tutulur. Yəni, bu körpü Bakının inkişaf konsepsiyasına uyğun gəlmir. Bunun əvəzində isə memarlar digər layihənin icrasını təklif edirlər. Bakı Dövlət Layihə İnstitutu tərəfindən hazırlanmış "Bakı şəhərinin mərkəzi hissəsinin müfəssəl Planı"na əsasən, nəqliyyat probleminin həlli üçün Neftçilər prospekti boyunca və ona paralel sualtı avtomobil tunelinin çəkilməsi təklif olunur. Bu təklif Bakının İnkişaf Konsepsiyasında da əksini tapıb. Tunel Bayılın əvvəlində, Bəhramgur abidəsindən bir neçə yüz metr əvvəl başlanır və Dəniz Vağzalının köhnə binasınadək davam etməlidir. Tunelin bulvarın kənarına birləşdirilməsi və onun üstünün torpaqla örtülməsi isə bulvarın eninin 20-30 metr artırılması ilə nəticələnəcək. Tuneldə onun əvvəli və sonu ilə yanaşı, daha bir çıxışın olması nəzərdə tutulur ki, bunun Azadlıq meydanında olması təklif edilir. Körpüdən fərqli olaraq, tunelin cəmi 3,6 km uzunluğu nəzərdə tutulur. Bu ideyanı memarların əksəriyyətinin dəstəkləyir, həmçinin tunel layihəsinin qiyməti Bakı Buxtası üzərindən çəkilməsi müzakirə olunan körpüyə nisbətən xeyli aşağıdır. Bu tunelin 2030-cu ilə kimi çəkilişi paytaxtın Baş Planında öz əksini tapıb".
Qeyd edək ki, tikintisi təxirə salınan Bakı buxtası üzərindən salınması nəzərdə tutulan "Bakı körfəzi dəniz körpüsü" Cənubi Koreyanın "Dong Sung Engineering" şirkətinə həvalə olunmuşdu. Bu körpünün dəniz üzərindəki uzunluğunun 13,3, ümumi uzunluğunun isə 26,5 kilometr olacağı nəzərdə tutulurdu. Dəniz körpusunun 2015-ci ilə qədər tikilib istifadəyə verilməsi planlaşdırılırdı.
