Əlaqə Arxiv
news Image
2013.04.11
13:25
| A A A
Milli Onkologiya Mərkəzinin şöbə müdiri özəl klinikalarla bağlı şok faktlar açıqladı-Eksklüziv
Azərbaycanda özəl klinikalarda şüateraiya və kimyaterapiya üçün avadanlıqlar olmadığından onkoloji xəstələr əməliyyat edilirmiş "Azərbaycanda onkoloji xəstəliklərin müalicəsi üçün özəl tibb müəssisələrində lazımi şərait yoxdur. Bəzi özəl tibb müəssisələri kimyaterapiya, şüaterapiyanın aparılması üçün şərait olmadığından onlara müraicət edən onkoloji xəstələri cərrahi əməliyyat edirlər".
Bu sözləri Movqe.az-a açıqlamasında Milli Onkologiya Mərkəzinin şöbə müdiri Samir Qurbanov söyləyib. S. Qurbanov deyir ki, halbuki, belə xəstələrə cərrahi əməliyyatla yanaşı şüaterapiya, kimyaterapiya tətbiq edilməlidir: "Bu müalicələri aparmaq üçün  özəl klinikalar avadanlıqlar almalıdırlar. Şüaterapiyanın aparılması üçün lazım olan avadanlıqların qiyməti 2,5 milyondur. Radioterapiyanın aparılması üçün? dərmanların qarışdırılmasında istifadə edilən avadanlıqlar və mütəxəssislər lazımdır. Özəl klinikaların bu aparatları almağa imkanları olmadığından və bu qədər vəsait xərcləmək rentabelli olmadığından, onlara üz tutan onkoloji xəstələri əməliyyat edirlər. Halbuki, bütün dünyada artıq əməliyyat ikinci plana keçib. Onkoloji xəstələrin radioterapiya və kimyaterapiya ilə müalicəsinə üstünlük verilir. Bu müalicə isə ixtisaslaşmış klinikalarda aparılır. Bu günlərdə Hamdi Koçer adlı türk həkim Milli Onkologiya Mərkəzinə qarşı bir sıra əsassız ittihamlar səsləndirdi. Halbuki, özü özəl klinikalarda onkoloji xəstələrin müalicəsi üçün lazımi şüaterapiya və kimyaterapiya avadanlıqları olmadığından xəstələri sadəcə  əməliyyat etməklə kifayətlənib. Ən dəhşətlisi isə odur ki, bu həkimin süd vəzisinin ödemli infiltrativ formalı xərçəngi,  körpücük altı və körpücük üstü limfa düyünlərə metastazı diaqnozu qoyulmuş qadınları sadəcə əməliyyat edərək kimya terapiya, şüa müalicəsi aparmamasıdır. Əslində bu diaqnoz qoyulmuş xəstəni əməliyyat etmək onun ömrünü yarıbayarı qısaltmaq deməkdir. H. Koçer isə bu çür xəstəliyə mübtəla olunmuş qadınları  sadəcə əməliyyat edib. Şüa terapiya, kimyaterapiya və hormono terapiyanın aparmadan. Çünki, bu müalicələrin aparılması üçün onun Azərbaycanda çalışdığı klinikada aparatlar və mütəxəssislər olmayıb. H. Koçer bizim Mərkəzdə də leksiya oxuyarkən şəxsən mən ondan soruşdum ki, süd vəzi xərçənginin ölçüsü 2 sm olan qadının süd vəzini itirməməklə, eyni zamanda xəstəyə kimya terapiya, şüa müalicəsi aparmamaqla neçə həyatda saxlamaq olar? H. Koçer etiraf etdi ki, bu mümkün deyil. Bu sözü efirdə reklam olunmaq üçün, çalışdığı klinikaya müştəri yığmaq üçün söyləyib".
S. Qurbanov deyir ki, ümumiyyətlə onkoloji xəstələrin ixtisaslaşmış klinikalarda müayinə və müalicəsi mütləqdir. Əks halda bu cür xəstələr onların xəstəliklərinin müalicəsi üçün şərait olmayan, şüa və kimyaterapiyanın aparılması üçün avadanlıqlar olmayan özəl klinikalarda müalicə olunmaqla ömürlərini qısaltmış olurlar: "Almaniya Federativ Respublikasında onkoloji tibbi xidmətlərin göstərilməsi üçün 2005-ci ildə klinikaların sayı 280-ə yaxın idi. Yoxlamalar zamanı bəlli oldu ki, həmin klinikaların mütləq əksəriyyəti bu sahə üzrə ixtisaslaşmayıb. Yəni lazımi avadanlıqlar, mütəxəssislər yoxdur. Həmin ildən qanunvericiliklə yalnız bu sahə üzrə ixtisaslaşmış klinikalara onkoloji xəstələrə tibbi xidmət göstərmək üçün icazə verildi. Bu klinikaların sayı Almaniyada 280-dan 50-ə düşdü".
S. Qurbanov deyir ki, bu gün Türkiyədən Azərbaycana həkimlər dəvət olunsa da, bu ölkənin özündə 100 min həkimə ehtiyac var: " Türkiyədə hələ Atatürkün dövründən xarici həkimlərin bu ölkədə işləməsi qanunvericiliklə yasaq idi. Amma sonra Türkiyədə həkim qıtlığının olması, bu ölkənin 100 min həkimə ehtiyacının olması nəzərə alınıb xarici ölkələrdən gələn həkimlərin Türkiyədə işləməsinə qanunla icazə verildi.  Maraqlıdır, H. Koçerin ölkəsində bu qədər həkimə ehtiyac olduğu təqdirdə, o niyə öz ölkəsində çalışmaqdan, Azərbaycanda işləməyi üstün tutur? Deməli, H. Koçer kimiləri, öz ölkəsində həkim kimi işləmək üçün şanslarının olmadığını gördükdə, Azərbaycan və sair ölkələrə iş üçün üz tuturlar. Bu gün Milli Onkologiya Mərkəzinin 10 şöbəsinin 4-də Avstriyadan, ABŞ-dan və sair ölkələrdən gələn həkim mütəxəssislər çalışır. O həkimlər dəvətlə bizim ölkədə iki-üç aydan artıq qalmırlar. Müqavilə müddəti bitdikdən dərhal sonra öz ölkələrinə əsas iş yerlərinə dönürlər. Bizdə isə özəl klinikaların dəvəti ilə Azərbaycana gələn həkimlər buranı əsas iş yerinə çevirirlər. Çünki, onların öz ölkəsində işlədikləri tibb müəssisəsi və onların yolunu gözləyən xəstələri yoxdur. Odur ki, xəstələr, xüsusilə onkoloji xəstələr belə ixtisaslaşdırılmamış özəl klinikalardan çəkinməli, onların müalicəsi üçün lazımi avadanlıqların, mütəxəssislərin olduğu tibb müəssisələrinə üz tutmalıdırlar ki, bu məkanların da sayı ölkə üzrə bəllidir".  

 
 
Sizin Reklam Yeriniz