Musa Quliyev: "Azərbaycanda “surroqat ana” olmağa razılığın verilməsini yasaqlayan qanun yoxdur" "Azərbaycanda "surroqat ana" olmağa razılığın verilməsini yasaqlayan qanun yoxdur. Əgər kimsə könüllü olaraq başqasının körpəsini öz bətnində daşımaq istəyirsə, buna görə heç kəsə çəza kəsilə bilməz".
Bu sözləri Movqe.az-a açıqlamasında Milli Məclisin Sosial Siyasət Komitəsinin sədr müavini, millət vəkili Musa Quliyev deyib. M. Quliyevin sözlərinə görə, "İnsan alverinə qarşı mübarizə haqqında" qanuna və Cinayət Məcəlləsinə əlavə və dəyişikliklərə görə, "surroqat ana" dan kimsə pulu ödənilməklə istifadə edərsə bu insan alveri və cinayət əməli sayılacaq: " Qadından "surroqat ana" kimi istifadə insan istismarı məqsədi ilə insan alveri hesab olunacaq və buna görə sərt cəzalar müəyyənləşəcək. Layihəyə əsasən bununla yanaşı köləliyə bənzər adətlər və ondan irəli gələn asılılıqlar, insanın daxili orqanının qanunsuz olaraq çıxarılması, insanın üzərində bio-tibbi tədqiqatların aparılması insan istismarı kimi insan alveri hesab olunacaq. Sadalanan bütün epizodlar üzrə Cinayət Məcəlləsinin 144-cü maddəsinə əlavə və dəyişikliklər edilərək müvafiq cəzalar da müəyyənləşəcək. Qeyd olunan insan istismarı hallarına görə müvafiq olaraq 4 ildən 12 ilədək azadlıqdan məhrum etmə nəzərdə tutulub. Layihə Milli Məclisin aprelin 19-da keçirilən iclasında müzakirəyə çıxarılacaq. Amma  kimsə könüllü olaraq öz yaxınının hüceyrəsini daşıyırsa bu qanunla cinayət əməli sayılmır".