"Təhsil Nazirliyində hər kəs iş başındadır. Hələ heç kəsi işdən
çıxarmayıblar. Bütün şöbə müdirləri öz işlərini görürlər. Cənab
nazir bu gün təqdim olundu."
Bu sözləri Movqe.az-a Təhsil Nazirliyinin Dərslik və Nəşriyyat
şöbəsinin müdiri Faiq Şahbazlı deyib. Onun sözlərinə görə,
mətbuatda nazirliyin əməkdaşlarının işdən çıxarılması barədə yer
alan xəbərlər şayədir: "Xəbəri dəqiqləşdirməmiş yazdıqları
açıq-aydın görünür. Əgər dəqiqləşdirsəydilər görərdilər ki,
nazirliyin əməkdaşları iş başındadır. Mən də hələki öz işimdəyəm.
Cənab nazir kimi məsləhət bilsə onunla işləyəcək, bilməsədəki yox.
Burada şişirtməyə, xaos yaratmağa ehtiyac yoxdur".
Qeyd edək ki, mətbuatda Təhsil Nazirliyinin işdən kənarlaşdırılan
əməkdaşları arasında Təhsil Nazirliyinin Dərslik və Nəşriyyat
şöbəsinin müdiri Faiq Şahbazlının və nazirliyin mətbuat xidmətinin
rəhbəri Bayram Hüseynzadəninin də adı hallanır. Amma mətbuat
xidməti şöbəsindən Movqe.az-a B. Hüseynzadənin işdən
kənarlaşdırılmadığını, öz işinin başında olduğunu söylədilər. B.
Hüseynzadənin yerinə tanınmış jurnalist Səbuhi Məmmədlinin
gətirilməsi xəbəri də öz təsdiqini tapmadı. S. Məmmədlinin həyat
yoldaşı jurnalist Samirə Əhmədbəyli bu xəbəri mətbuatdan
eşitdiklərini və yalan olduğunu bildirdi.