Əlaqə Arxiv
news Image
2013.04.26
16:23
| A A A
Suraxanı rayonunda 2013-ü ilin 1-ci rübünün nəticələri müzakirə olunub

Mövqe.az-ın məlumatına görə, Suraxanı Rayon İcra Hakimiyyəti başçısı yanında Şuranın 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş geniş iclası keçirilib. 


Şura iclasında məruzə ilə çıxış edən Rayon İcra Hakimiyyətinin başçısı İlqar Abbasov  aprel ayının 14-də Azərbaycan Respublikasının Prezidenti cənab İlham Əliyevin sədrliyi ilə Nazirlər Kabinetinin 2013-cü ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunmuş iclasında  dövlət başçısının nitqinin bəzi məqamlarına toxunub, ölkəmizin sosial-iqtisadi mənzərəsini əks etdirən konkret rəqəmləri bir daha iclas iştirakçılarının diqqətinə çatdırıb. Bildirilib ki, möhtərəm Prezidentimiz cənab İlham Əliyevin ölkəmizin sosial-iqtisadi inkişafının bütün sahələrində əldə olunmuş nailiyyətlər və qarşıda duran vəzifələrlə bağlı  dəyərli tapşırıq və tövsiyələri yerlərdə əsl fəaliyyət proqramı kimi  qəbul olunub.

Rayon rəhbəri qeyd edib ki, Azərbaycan  Respublikasının Prezidenti cənab İlham Əliyevin diqqət və qayğısı sayəsində Suraxanı rayonunda da ötən dövr ərzində Dövlət və yerli Proqramlarının yerinə yetirilməsi işləri uğurla davam etdirilib.


2013-cü ilin 1-ci rübündə rayonun sənaye müəssisələri tərəfindən 75,9 milyon, tikintidə 9,1 milyon manat (+6,5%), nəqliyyatda 3,2 milyon manat (+6,5%) həcmində  iş görülmüş, əsas kapitala 5,1 milyon manat investisiya yönəldilib, pərakəndə ticarət dövriyyəsi 61,7 milyon manat (+3,7%) təşkil edib, 683 yeni iş yeri yaradılıb, orta aylıq əmək haqqı 561 manata (+12,9%) çatdırılıb, rayon əhalisi 207,6 min nəfər təşkil edib, 2012-ci ilin müvafiq dövrünə nisbətən artım 1,5% olub. 

Azərbaycan Respublikası Prezidentinin Sərəncamı ilə təsdiq edilmiş "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nda rayon üzrə nəzərdə tutulmuş 102 tədbirin 34-ü tam icra olunub, 50-nin icrasına başlanılıb, 18-nin icrasına başlanılmamış, icrasına başlanılan və başa çatdırılan tədbirlər proqramın 83,3 faizini təşkil edib, həmin Proqramın "Əlavə Tədbirlər Planı"nda nəzərdə tutulmuş 48 tədbirin 7-nin icrasına başlanılıb və onlar proqramın 14,6 faizini təşkil edir.

2013-cü ilin 1-ci rübündə  rayonda 9250 p.m. qaz xətti, 645 p.m su xətti çəkilib, 3828 ədəd "Smart-kart" tipli elektron qaz sayğacı, 2020 ədəd su sayğacı, 3 Kompleks Transformator Məntəqəsi quraşdırılıb, 6986 p.m. kabel xətti və 1292 p.m. naqil çəkilib, 75,0 min kv.m. asfalt örtüyü salınıb, 3 istilik qazanxanasının tikintisinə başlanılıb. 

85 saylı orta məktəb üçün yeməkxana, laboratoriya, idman və akt zalının tikintisi, 2 uşaq bağçasında əsaslı təmir işləri başa çatdırılıb, "Gənclər evi"nin,  Rayon Polis İdarəsinin yeni inzibati binasının, 84 saylı orta məktəbin yerində yeni 960 şagirdlik məktəb binasının, 2 saylı Bərpa Xəstəxanasının köhnə binasının yerində yeni xəstəxana binasının, 1000 şagird yerlik 2 əlavə tədris korpusunun, idman zalının, 1 xəstəxananın, 6 uşaq bağçasının, 2 poliklinikanın,  2 saylı uşaq evinin və 1 Tibbi sanitar hissəsinin əsaslı təmiri işləri davam etdiriib, şahmat məktəbinin tikintisinə başlanılıb.

Zığ qəsəbəsində qəza nəticəsində yararsız vəziyyətə düşmüş yaşayış binasının əvəzinə RİH tərəfindən 5 mərtəbəli, 2 girişli, 25 mənzilli yaşayış binasının tikintisi başa çatdırılıb və sakinlərin evlərə köçürülməsinə başlanılıb.


Azərbaycan Respublikası Hökuməti və Dünya Bankı tərəfindən birgə icra edilən "Bərk Məişət Tullantılarının Vahid İdarəçiliyi Layihəsi" çərçivəsində Zığ və Bülbülə qəsəbələrində, Yeni Günəşli yaşayış sahəsində əvvəllər mövcud olmuş məişət tullantıxanaları təmizlənib.

22 fevral tarixdə Sahibkarlığa Kömək Milli Fondu və RİH-in birgə təçkilatçılığı və 120 nəfər sahibkarın iştirakı ilə növbəti 5-ci kredit yarmarkası keçirilib. 

İlqar Abbasov xüsusi vurğulayıb ki, bu ilin mart ayının 29-da Azərbaycan Respublikasının Prezidenti cənab İlham Əliyev və Heydər Əliyev Fondunun Prezidenti, YUNESKO və İSESKO-nun Xoşməramlı səfiri, Milli Məclisin deputatı Mehriban xanım Əliyeva rayonumuzu şərəfləndirərək "Atəşgah məbədi" Dövlət Tarix Memarlıq Qoruğuna gəliblər.

Burada 2012-ci ilin sentyabrından başlayaraq Heydər Əliyev Fondunun dəstəyi ilə məbədətrafı ərazilərin abadlaşdırılması, yardımçı binaların tikintisi işlərinin aparıldığı və 7 ay ərzində başa çatdırıldığı cənab Prezidentin diqqətinə çatdırılıb, cənab Prezident aparılan bərpa və yenidənqurma işləri ilə yaxından tanış olub və müvafiq tapşırıqlarını verib.


Vətəndaşların sosial müdafiəsinin gücləndirilməsi işi daim rayonun dövlət orqanlarının diqqət mərkəzindədir.

          

 Belə ki, 2013-cü ilin 1-ci rübü ərzində Rayon Əhalinin Sosial Müdafiəsi Mərkəzi tərəfindən 174 ailəyə yeni sosial müavinət,  668 ailəyə ünvanlı sosial yardım, 424 yeni doğulmuş uşağa 33,1 min manat birdəfəlik müavinət təyin edilib, bütövlükdə bu dövr ərzində 1,1 milyon manat sosial müavinət və 1,3 milyon manat  sosial yardım ödənilib.


Dövlət Sosial Müdafiə Fondunun rayon şöbəsi tərəfindən rüb ərzində fərdi sahibkarlıq fəaliyyəti ilə məşğul olan fiziki şəxslərdən 344,5 min manat vəsait toplanıb, artım 63,0 faiz təşkil etmiş, 271 nəfərə pensiya təyin edilib, bu dövr ərzində 26797 nəfər təqaüdçüyə 13,1 milyon manat pensiya ödənilib, orta aylıq pensiya məbləği 162 manata çatdırılıb, artım 9,4 faiz təşkil edib.


2013-cü ilin 1-ci rübü ərzində Rayon Məşğulluq Mərkəzinə  286 nəfər müraciət edib, 160 nəfər, o cümlədən kvota üzrə 5 nəfər işlə təmin olunub.


Kənd Təsərrüfatı Nazirliyi ilə birgə təşkil edilmiş kənd təsərrüfatı məhsullarının satış yarmarkalarında 1-ci rüb ərzində rayon əhalisinə  260 ton kənd təsərrüfatı məhsulları satılıb.

    

Ötən dövr ərzində vətəndaşların müraciətlərinə diqqət və qayğı ilə yanaşılıb, onların problemlərinin həllinə hərtərəfli köməklik göstərilib.


2013-cü ilin I rübü ərzində Rayon İcra Hakimiyyətinə 1034 vətəndaş müraciəti daxil olub.


Müraciətlərin böyük hissəsi fərdi yaşayış evlərinin tikintisi, layihələrinin təsdiqi, ilkin hüquqi qeydiyyata alınması, mənzil növbəsinə götürülmə, mənzil və torpaq sahəsi ilə təmin olunma, su və kanalizasiya xətlərinin çəkilməsi, küçə və yolların asfaltlanması, maddi köməklik göstərilməsi, ünvanlı sosial yardım verilməsi və s. məsələlərlə bağlıdır.

2013-cü ilin 1-ci rübündə Rayon İcra Hakimiyyətində 575 nəfər, o cümlədən RİH başçısı tərəfindən 184 nəfər vətəndaş qəbul edilib, qəsəbələrdə sakinlərlə 12 səyyar görüş-qəbul keçirilib, qəbullarda 837 nəfər sakin iştirak edib, qaldırılan məsələlərin əksəriyyəti müsbət həll edilib.


RİH başçısının yanında Şuranın iclaslarında rayonun sosial-iqtisadi həyatına, hərtərəfli inkişafına dair məsələlər mütəmadi müzakirə edilərək müvafiq qərarlar qəbul edilib.

Ötən dövr ərzində də təsdiq edilmiş tədbirlər planlarına əsasən rayonda bir çox ictimai-siyasi tədbir keçirilib, bu günə qədər Heydər Əliyev Mərkəzinin fəaliyyəti ilə 41 mindən yuxarı yerli və xarici ziyarətçi tanış olub, Mərkəzin Elektron kitabxanasının xidmətindən 9,5 min istifadəçi faydalanıb, Mərkəzdə 2013-cü ilin 1-ci rübü ərzində 4 ümumrayon tədbiri keçirilib.

Məruzə ətrafında çıxışlar olub.


Hesabat yığıncağına yekun vuran İlqar Abbasov bildirib ki, Suraxanı rayonunun sosial-iqtisadi inkişafı, əhalinin həyat səviyyəsinin yaxşılaşdırılması, geniş abadlıq və quruculuq işlərinin aparılması, onlara göstərilən kommunal və digər xidmətlərin səviyyəsinin yüksəldilməsi istiqamətində işlər ilin qalan dövrü  ərzində davam etdiriləcək, dövlət başçısı İlham Əliyevin Nazirlər Kabinetinin məlum iclasında qarşıya qoyduğu vəzifələrin icrası naminə bütün imkanlar səfərbər olunacaq.


Suraxanı rayonuna göstərilən diqqət və qayğıya görə İlqar Abbasov rayon sakinləri adından bir daha Azərbaycan Respublikasının Prezidenti cənab İlham Əliyevə minnətdarlığını bildirib və dövlətimizin başçısını əmin edib ki, rayonun əmək kollektivləri və sakinləri həmişə olduğu kimi, yenə də Heydər Əliyev siyasi kursuna sadiqliyini nümayiş etdirəcək, qazanılmış uğurların daha da artırılması və ölkəmizin iqtisadi qüdrətinin gündən-günə möhkəmləndirilməsi üçün əzmlə çalışacaqlar. 

Hesabat yığıncağında Milli Məclisin deputatları Ağacan Abıyev və Fərəc Quliyev iştirak edib.

          


Sizin Reklam Yeriniz