Qəzet satışı ilə məşğul olan bəzi köşklərdə ölkədəki bütün mobil operatorların danışıq kartları 10 qəpik baha satılır. Movqe.az-ın apardığı kiçik araşdırma zamanı bəlli olub ki, bu qanunsuz qiymət artımını  köşklər özləri edirlər. Köşklərin satıcıları isə danışıq kartlarını baha qiymətə satmalarının səbəbini dilerlərdən baha qiymətə almaları ilə əlaqələndiriblər. Amma mobil operatorlar dilerlərə danışıq kartlarının satışında da qiymətdə heç bir dəyişiklik etmədiklərini söyləyirlər. "Bakcell"in mətbuat xidmətindən bildirdilər ki, "Bakcell" danışıq kartlarının qiymətində heç bir dəyişiklik etməyibdir: "Azərbaycanda "Bakcell"in danışıq kartlarını təklif edən 10 000-dən artıq müstəqil satış nöqtələri mövcuddur. Bu satıcılar danışıq kartlarını bizim xüsusi distribyuter və ya vasitəçilərdən əldə edərək son istifadəçilərə satırlar. Bu cür satıcıların "Bakcell" şirkətinə heç bir aidiyyatı yoxdur. "Bakcell" şirkətinin müstəqil surətdə fəaliyyət göstərən satıcıların qiymət siyasətinə təsir etmək ixtiyarı və hüququ yoxdur. Qiymətlərin aydın və anlaşıqlı olması üçün "Bakcell" şirkəti  hər kartın dəyərini kartın üzərində qeyd edir". 
Nar Mobile dan da danışıq kartlarına süni qiymət artımı edildiyini söylədilər. Şirkətin mətbuat xidmətindən bildirdilər ki, Nar Mobile mobil operatoru balansı artırmaq üçün 2, 5, 10, 20 və 50 AZN nominalında ödəniş kartlarını satışa çıxarır: "Yuxarıda qeyd olunan nominallar üzrə ödəniş kartlarının başqa və ya süni artırılmış qiymət ilə satışı qəti qadağandır və qeyri-qanunidir.  Nar ödəmə kartlarını "Nar Dünyası" satış və xidmət mərkəzlərində, diler dükanlarında və ya digər ticarət məntəqələrində əldə etmək mümkündür. Bundan əlavə, Nar abunəçiləri balanslarını bank və ya bank filialları, AXM-lər, poçt və Paypoint köşkləri, həmçinin internet vasitəsilə də (GoldenPay və Azericard) ödəyə bilərlər.
"Azercell" Telekom-un mətbuat xidmətindən isə bildirdilər ki, paytaxtın bəzi satış məntəqələrində Azərbaycanın mobil rabitə operatoru "Azercell Telekom" MMC-nin sim kartlarının qiymətləri süni şəkildə artırılır: "Bakıda bəzi satış məntəqələrində Azercell Telekom-un danışıq kartlarının qiymətlərinin süni şəkildə artırılmasına dair dəfələrlə müraciət və suallar daxil olub. Şirkət bəyan edir ki, sim kartların nominal qiymətlərindən baha qiymətə satılması halları həmin kartların satıldığı məntəqələrin özbaşınalığı və Azercell şirkəti ilə razılaşdırılmamış fəaliyyətinin nəticəsidir".
İqtisadi İnkişaf Nazirliyindən isə bildirirlər ki, alıcıların seçim etmək imkanı var: "Alıcılar danışıq kartlarını hansı ticarət obyektində üzərində göstərilən qiymətə satırlarsa, həmin mağazadan da əldə edə bilərlər. Yəni seçim etmək imkanları var. O ki, qaldı danışıq kartlarının üzərindəki qiymətdən baha satımasına, burada əgər mobil operatorla müqavilə bağlanılmayıbsa, qanunazidd  əməl yoxdur. Bəzi şəxslər başqa ticarət mərkəzlərindən danışıq kartlarını alıb gəlir əldə etmək üçün bir qədər baha qiymətə satırlar. Alıcının da imkanı var ki, seçim etsin. Yəni baha qiymətə satılan yerdən yox, üzərindəki qiymətə satılan ticarət obyektindən alsın. Amma dilerlərlə müqavilə əsasında ticarət obyektlərinə satılan danışıq kartlarının qiyməti, üzərində göstərilən qiymətdən baha deyil. Çünki, şirkət özü dilerlərə, dilerlər isə mağazalara danışıq kartının satışında müəyyən gəlir əldə etmək imkanı yaradır".