Tələbə Qəbulu üzrə Dövlət Komissiyası (TQDK) ölkə prezidentinin fərmanına əsasən, aprelin 29-da, 30-da və mayın 1-də Gəncə, Göygöl, Şəmkir, Tovuz, Qazax, Ağstafa, Mingəçevir, Şəki, Qax, Balakən, Oğuz, Qəbələ və İsmayıllı rayonlarında ümumi təhsil müəssisələrinin V və XI sinif şagirdləri arasında monitorinq imtahanları keçirir. TQDK-nın mətbuat xidmətindən Movqe.az-a verilən xəbərə görə, ümumi təhsil müəssisələrinin XI sinif şagirdləri aprelin 29 -da Azərbaycan dilindən imtahan verib. Bu gün riyaziyyatdan, mayın 1-də isə fizika fənnindən imtahan verəcəklər. Azərbaycan bölməsinin V sinif şagirdləri aprelin 29–da Azərbaycan dilindən, aprelin 30-da isə riyaziyyat fənnindən imtahan verirlər. Rus bölməsinin V sinif şagirdləri isə mayın 1-də rus dili fənnindən imtahan verəcəklər. Bərdə, Ucar, Göyçay, Ağdaş, Şirvan, Kürdəmir, Biləsuvar, Masallı, Neftçala, Salyan, Lənkəran, Quba və Şabran rayonlarında isə imtahanlar 6, 7 və 8 may tarixlərində keçiriləcək.