Azərbaycanlıların Soyqırımı Günü dünyanın 10 ölkəsində qeyd olunacaq
Azərbaycanlıların Soyqırımı Günü ilə əlaqədar dünyanın bir sıra
ölkəsində Azərbaycan diasporunun təşkilatçılığı ilə müxtəlif
tədbirlər, soyqırımı qurbanlarının anım mərasimləri, sərgi və
konfranslar keçiriləcək. Diasporla İş Üzrə Dövlət Komitəsindən
verilən məlumata görə, Moskva, Sankt-Peterburq, Yekaterinburq,
Murmansk və digər şəhərlərində Ümumrusiya Azərbaycanlıları
Konqresi, Rusiyanın Azərbaycanlı Gənclər Təşkilatının və digər
Azərbaycan təşkilatlarının təşəbbüsü ilə keçiriləcək tədbirlərdə
1918-ci ilin mart-aprel aylarında erməni millətçiləri və daşnak
qrupları tərəfindən azərbaycanlılara qarşı törədilmiş vəhşiliklər
barədə fakt və sənədlərə əsaslanan məlumatlar veriləcək.
Soydaşlarımız dünya ictimaiyyətinin bu cinayətə hüquqi qiymət
verməyə səsləyəcəklər. Soyqırımı qurbanlarının xatirəsi Türkiyə,
ABŞ, Ukrayna, Belarus, Latviya, Litva, Estoniya, Gürcüstan,
Qazaxıstanda yaşayan soydaşlarımız tərəfindən də yad ediləcək.