Fransanın paytaxtı Paris şəhərində Avropa Şurası Parlament Assambleyasının (AŞPA) Sosial məsələlər, səhiyyə və davamlı inkişaf üzrə komitəsinin növbəti iclası keçirilib.

Mövqe.az xəbər verir ki, komitənin iclasında "Avropada uşaq yoxsulluğu" mövzusunda müzakirələr aparılıb.

Sözügedən məsələ üzrə məruzəçi təyin olunmuş Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva məruzənin ilkin variantını komitəyə təqdim edərək, müzakirə olunacaq məsələyə münasibətini bildirib.

S.Fətəliyeva qeyd edib ki, bütün dünyada uşaqlar yetkinlik yaşına çatana qədər kimdənsə, daha doğrusu, ailənin maliyyə vəziyyətindən asılıdır və bunu dəyişə bilməzlər.

"Qarşımızda bir neçə sual qoyuruq: Yoxsulluq uşaqlar üçün nədir? Gəlirlər uşaqların günlük həyatına necə təsir edir? Kifayət qədər qida, təhsilin keyfiyyəti və şəraiti, yaşadığı yer və məkan, ailədəki mühit, ailədaxili zorakılıq, evsizlik, sosial və tibbi servisin təmini, valideynlərin işsizliyi və maddi durumun aşağı səviyyəsi - bütün bunların uşaq yoxsulluğuna təsiri araşdırılmalıdır.

Müasir dövrdə dünyada baş verən maliyyə böhranın qurbanı olan ölkələrdəki iqtisadi vəziyyət yoxsulluğun əsas səbəblərindəndir. Əgər Avropanın gələcəyindən söhbət gedirsə, bu gündən bu sahədə fəaliyyəti gücləndirməliyik. Məruzənin əsas məqsədi - uşaq siyasətini prioritet məsələyə çevirmək, Avropa Şurasına üzv ölkələrin xüsusi milli strategiyaların yaranmasına təkan verməkdir" - deyə, millət vəkili sözlərinə əlavə edib.

Qeyd edək ki, çıxışdan və komitə üzvlərinin müzakirəsindən sonra məruzə qəbul edilib.