Son vaxtlar bəzi prezidentliyə namizədlər tərəfindən
Azərbaycanda pensiyaya çıxma yaşının 65, yaşa görə pensiya
alanların pensiyada olma müddətinin 4-5 il təşkil etdiyi barədə
açıqlamalar verilir. Bu isə pensiya yaşına çatmış insanlar arasında
müəyyən çaşqınlıq yaradıb. Çünki qanunvericilikdə qeyd olunanlarla
bəzi prezidentliyə namizədlərin açıqlamaları arasında ziddiyyət
var. Movqe.az-ın Trend-ə istinadən verdiyi məlumata görə,Dövlət
Sosial Müdafiə Fondunun İctimaiyyətlə əlaqələr sektorunun müdiri
Elman Babayev bildirib ki, bu açıqlamaların heç biri doğru
deyil. Onun sözlərinə görə, "Əmək pensiyaları haqqında"
Azərbaycan Respublikası Qanununa əsasən, Azərbaycanda kişilər 63
yaşına çatdıqda və ən azı 12 il sığorta stajı olduqda yaşa görə
əmək pensiyası almaq hüququ var. Qadınlar üçün isə bu yaş həddi 1
yanvar 2013-cü il tarixdən il üzrə 59 yaş təşkil edir: "Bu baxımdan
Azərbaycanda pensiya yaşının 65 olması barədə deyilənlər doğru
deyil. Pensiyada olma müddətinin 4-5 il təşkil etdiyi barədə
məlumatlara gəldikdə isə həmin məlumatlar da həqiqətəuyğun deyil və
Dövlət Sosial Müdafiə Fondunun avtomatlaşdırılmış mərkəzi məlumat
bazasında mövcud olan informasiyalarla tam ziddiyyət təşkil
edir".
Fondun mərkəzi məlumat bazasında olan göstəricilərə əsasən, son 7
ildə yaşa görə pensiya alan və vəfat etmiş qadınların orta yaşı
77,2, kişilərin orta yaşı isə 75,7 olub.
Hazırda yaşa görə pensiya alanların pensiyada olma müddəti qadınlar
üçün 19 il, kişilər üçün isə 12,7 il təşkil edir. Ümumilikdə isə
Azərbaycanda pensiyada olma müddəti orta hesabla 16 ildir. Bundan
başqa, "Əmək pensiyaları haqqında" qanuna əsasən, güzəştli
şərtlərlə əmək pensiyası hüququ olan şəxslər daha erkən pensiyaya
çıxırlar və bu kateqoriyadan olan vətəndaşların pensiyada olma
müddəti orta hesabla 22 il təşkil edir.