Bu ilin sonunadək respublika ərazisində fəaliyyət göstərən 108 özəl klinikaya tibb və ya əczaçılıq fəaliyyəti ilə məşğul olmaq üçün xüsusi razılığın verilməsi müddəti başa çatır. Movqe.az-ın əldə etdiyi xəbərə görə, həmin tibb müəssisələrində Vergilər və İqtisadiyyat və Sənaye Nazirliyi tərəfindən yoxlama aparılacaq. Nazirlikdən Movqe.az-a bildiblər ki, lisenziya müddəti başa çatmış, amma lisenziya almaq üçün indidən müraciət edən özəl tibb müəssisələrinin adı Səhiyyə, Vergilər və İstisadiyyat və Sənaye Nazirliklərinin birgə izlədiyi sistemə salınmayacaq: "Əgər artıq onların arasında lisenziya üçün müraciət edənləri varsa, həmin özəl tibb müəssisələrinin adı sistemə salınmayacaq. Lisenziya müddəti başa çatan, lakin lisenziya üçün müraciət etməyən özəl klinikaların adı isə sistemdə qırmızı işıqla göstəriləcək ki, Vergilər Nazirliyi ilə İqtisadiyyat və Sənaye Nazirliyi həmin tibb müəssisələrinin fəaliyyətlərini davam etdirib-etdirmədiyini yoxlasın. Və cərimələr tətbiq etsin. Əgər lisenziya müddəti başa çatan özəl tibb müəssisələri fəaliyyətlərini davam etdirəcəklərsə, yenidən lisenziya almaq üçün Səhiyyə Nazirliyinə müraciət etməlidirlər". 

Qeyd edək ki, lisenziyanın verilməsi  "Dövlət orqanlarının elektron xidmətlər göstərməsinin təşkili sahəsində bəzi tədbirlər haqqında"Azərbaycan Respublikası Prezidentinin 2011-ci il 23 may tarixli 429 nömrəli Fərmanına əsasən tibb və ya əczaçılıq fəaliyyəti ilə məşğul olmaq üçün xüsusi razılığın (lisenziya) alınması məqsədi ilə ərizələrin və qanunvericiliyə uyğun olaraq tələb olunan sənədlərin qəbulu artıq internet vasitəsi ilə də həyata keçirilir. Lisenziya müddəti başa çatan özəl tibb müəssisələrinin ərizələrin və tələb olunan sənədlərin internet vasitəsi ilə elektron qəbulu üzrə konsultativ yardım Səhiyyə Nazirliyinin Ümumi şöbəsində hər həftənin çərşənbə günləri saat 10.00- 13.00-dək göstərilir.