Azərbaycanda enerji səmərəli binalar inşa oluna bilər
Cahangir Qocayev: "Bizdə də binaların damında günəş batereyaları yerləşdirilə və evlər həmin enerjidən istifadə etməklə qızdırıla, işıqlandırıla bilər"
Avropa Birliyi ölkələrində enerji səmərəli olmayan binaların
tikintisinə qadağa qoyulur. Artıq bu istiqamətdə sərt qaydaların
tətbiqinə başlanılıb. Enerji səmərəli dedikdə binaların həm
istilik saxlama, həmçinin də, alternativ enerji mənbələrindən
yararlana bilmək imkanları başa düşülür. Qeyd edək ki, Azərbaycanda
da artıq alternativ enerji mənbələrin geniş tədqiqatına
başlanılıb. Hətta bəzi ərazilərdə bunun üçün xüsusi qurğular da
quraşdırılıb. Bəs görəsən Azərbaycanda necə, gələcəkdə enerji
səmərəsi 0-a bərabər olan yaşayış binalarının, sosial obyektlərin
tikintisinə qadağa şamil oluna bilərmi? Dövlət Şəhərsalma və Arxitektura Komitəsinin Beynəlxalq
əlaqələr və informasiya şöbəsinin rəhbəri Cahangir Qocayev
Movqe.az-a açıqlamasında bunun istisna olmadığını bildirib. C.
Qocayev deyir ki, Azərbaycanda da gələcəkdə binaklar tikilərkən
enerji səmərəli olması şərt kimi qoyula bilər: "Ümumiyyətlə
binaların enerji səmərəli olması tələbi var. Binalar inşa olunarkən
texniki dayanıqlığı, səs keçirməzliyi ilə yanaşı istilik saxlama
qabiliyyəti də nəzərə alınır. Amma hələki Azərbaycanda alternativ
enerji mənbələri vasitəsilə qızdırılan binalar yoxdur. Gələcəkdə
təbii ki, bu istisna deyil. Xarici ölkələrdə olduğu kimi, bizdə də
binaların damında günəş batereyaları yerləşdirilə və evlər həmin
enerjidən istifadə etməklə qızdırıla, işıqlandırıla
bilər".
C. Qocayevin sözlərinə görə, hələki Azərbaycanda yeni tikililərə bu şərti qoymaq düzgün olmazdı: "Bizdə alternativ enerji mənbələrinin öyrənilməsi məqsədilə yeni agentlik yaraddılıb. Samuxda salınacaq bir yaşayış massivində evlər alternativ enerjidən bəhrələnirlər. Bu təcrübə yarandıqdan sonra yəqin ki, gələcəkdə bizdə bu texnologiyadan geniş istifadə edəcəyik".