Rusiyada əlil azərbaycanlını döyməkdə şübhəli bilinən şəxs saxlanılıb

Hazırda Rövşən Kazımov polis bölməsində şübhəli şəxslə üzləşir Hazırda Rövşən Kazımov polis bölməsində şübhəli şəxslə üzləşir Rusiyanın Zelenoqrad şəhərində avtobusla məktəbə gedərkən 23 yaşlı bir şəxs tərəfindən vəhşicəsinə döyülən 14 yaşlı azərbaycanlının ümumi sağlım durumu yaxşıdır, yalnız onun sol gözündə ciddi problem aşkarlanıb. ANS PRESS-in verdiyi məlumata görə, bunu azərbaycanlı yeniyetmənin anası Aygün Kazımova telefonla söhbətində bildirib. Onun sözlərinə görə, hazırda uşaqla birgə polis idarəsindədir və Rövşəni döyən Mixail adlı şəxslə üzləşdirəcəklər. "İstintaq işini davam etdirmək üçün polis idarəsi bu gün Rövşəni bura dəvət edib. Bir azdan Mixaillə üzləşmə prosesi başlayacaq. Eşitdiyimə görə, üzləşməyə baxmayaraq həmin adamı azadlığa buraxacaqlar, çünki deyilənə görə, onun bacısı polis orqanlarında çalışır".

ANS PRESS-in "Rövşənin müalicə pulunu kim ödəyib?" sualına Aygün xanım "Bütün xərcləri Azərbaycanın Rusiyadakı səfirliyi öz boynuna götürdü. Təkcə səfirliyin əməkdaşlarına deyil, Azərbaycandan biz dəstək olan hər kəsə minnətdarlığımızı bildiririk" cavabını verdi.

Xatırladaq ki, avtobusda döyülən Rövşən qan içində olmasına baxmayaraq naməlum şəxs onun başına və qarın nahiyəsinə yumruq və təpiklə vurmaqda davam edib. Qadın sərnişinlərdən biri əlil azərbaycanlını rusun əlindən almağa çalışsa da, buna nail ola bilməyib. İnsidentin qarşısı yalnız avtobus dayanacağında növbə çəkən polislər işə qarışdıqdan sonra alınıb.