Məlum olduğu kimi, Səhiyyə Nazirliyi Respublika Gigiyena və Epidemiologiya Mərkəzi tərəfindən 2006-cı ildən toyuq dönərinin satışının qadağan edilib. Lakin bu qadağaya baxmayaraq, hələ də bir çox dönərxanalarda toyuq dönəri satılır. Üstəlik buna dönərxanaların əksəriyyətində təsadüf olunur. Orqanizmə zərərləri haqda dəfələrlə məlumat verilməsinə baxmayaraq, alıcılar tərəfindən də toyuq dönərinə daha çox üstünlük verildiyindən, dönərxanalar toyuq dönərinin satışını dayandırmırlar. Milli yeməklərimiz qala-qala hazırlanması tez və ucuz başa gələn dönərə üstünlük verən insanlar özlərinə vurduqları zərərdən xəbərdar deyillər. 

Quş qripi  ilə əlaqədar satışı qadağan olunan toyuq dönərinin infeksiyalaşmağa daha çox meyilli olduğunu deyən tibb məsələləri üzrə ekspert, professor Adil Qeybulla movqe.az-a açıqlamasında  istehlaka buraxılan ətin bəzən baytarlıq xidməti tərəfindən düzgün yoxlanılmadığını da bildirdi: "Toyuq dönərinin satışı bir neçə il öncə quş qripi epidemiyasının yayılması ilə bağlı qadağan olunmuşdu. O zaman praktiki olaraq quş ətinin istehlakı qadağan olunmuşdu. Bu qadağa da o müddətə təsadüf edir. Digər tərəfdən, dönərxanalarda satılan ət həm adi sanitariya qaydaları, həm də keyfiyyət cəhətdən normativlərə cavab verməlidir. Əsas məsələ budur. Toyuq əti infeksiyalaşmağa daha çox həssasdır. Belə ki, dönərin tam bişib-bişməməsi məsələsi də sual altında olur. Bişmədikdə, toyuq ətində mal ətinə nisbətən mikroblar daha çox yığılır. Məsələn, brüsselyozlu xəstə müəyyən viruslar olan toyuq ətindən istifadə edirsə, bu yolverilməzdir. Toyuq dönərinin satışı ilə bu kimi problemlər yaşana bilər. Əslində, istehlaka buraxılan bütün ət məhsulları ilkin olaraq baytarlıq nəzarətindən keçir. Baytarlar həmin ətin üzərinə möhür vururlar. Və həmin möhürə görə də məsuliyyət daşıyırlar. Yəni həmin möhür bildirir ki, bu ət tam təhlükəsizdir. Təssüflər olsun ki, çox vaxt bu möhürlər formal xarakter daşıyır. Dönərxanaların marağı isə yalnız dönəri satmadır. Başqa bir şey haqda heç məlumatları da yoxdur". 

Səhiyyə Nazirliyi Respublika Gigiyena və Epidemiologiya Mərkəzinin Qidalanma gigiyenası şöbəsinin müdiri İmran Abdullayev məsələ ilə bağlı ölkədə mütəmadi olaraq inzibati tədbirlərin görüldüyünü dedi: "Dövlət Sanitariya Nəzarəti xidməti yalnız dövlətin verdiyi səlahiyyət çərçivəsində hərəkət edə bilir. Məsələ ilə bağlı əlbəttə ki, mütəmadi olaraq inzibati tədbirlər həyata keçirilir. Satış yerlərində sanitariya qaydalarını pozulanda, icazə sənədləri olmadan toyuq dönəri və ya mal ətindən hazırlanmış dönər satılanda mütləq onlara qarşı inzibati tədbirlər görülür və cərimələr tətbiq edilir. Sanitariya qaydalarının pozulmasında bir çox dönərxanalarda təsadüf olunur. Yoxlamalar zamanı belə hallar aşkarladıqda, biz həmin müəssisələrə cərimələr tətbiq edirik". 

İmran Abdullayev dövlət tərəfindən müəyyən olunan cərimələrin məbləğinin az olduğunu düşünür: "Amma bu cərimələrin məbləği o qədər də böyük deyil. Cərimələrin məbləği cəmi 100-400 manat arasındadır. Əgər hüquqi şəxsdirsə, 400 manata qədər cərimə oluna bilir. Amma fiziki şəxslərə maksimum 200 manat cərimə tətbiq edə bilirik. O cərimələri də əksərən ödəyirlər. Amma çox hallarda  cərimələnən şəxslər onlara tutulan iradları aradan qaldırmağı qarşılarına məqsəd qoymurlar və bunun üçün heç nə etmir, əvvəlki fəaliyyətlərinə davam edirlər. Bu sahədə insanlar tez-tez dəyişir. Hər həftə bir yeni dönərxana fəaliyyətə başlayır. Və yaxud da eyni dönərxanada başqa adamlar fəaliyyətə başlayır. Dönər satışı yerləri fast-food yeməkləri olaraq daha zərərli yeməklər qrupuna aid edilir. Çoxlu sayda dönərxanalar var ki, işləmək üçün şəraiti yararsız olduğuna görə onların fəaliyyəti də tamamən dayandırılıb. Bu sahədə işlər görülür və gələcəkdə də davam etdiriləcək".