Xaricdə müalicəyə gedənlərə xəbərdarlıq-Özəl
Musa Quliyev: "Ölkədən xaricdə istənilən müalicə riskdir"
"Ölkədən xaricdə istənilən müalicə riskdir. Xüsusilə də cərrahi
müdaxilələrlə bağlı tibbi yardım almaq.Bu zaman pasiyentlər
aldıqları tibbi xidmətin effekt verməməsi ilə bağlı problem
yaranarkən xaricdə hansısa instansiyaya müraciət edə bilmirlər". Bu
sözləri Movqe.az-a açıqlamasında Milli Məclisin Sosial Siyasət
Komitəsinin sədr müavini, millət vəkili Musa Quliyev söyləyib. M.
Quliyev bildirib ki, Azərbaycanda hələki səhiyyə turizmi anlayışı
formalaşmayıb. Ona görə də, insanlar özləri xaricdəki tibb
müəssisələrinə üz tutanda yalnışlığa yol verirlər. Düzgün seçim
etmədiklərindən Azərbaycanda onlara göstərilən tibbi yardımdan
dəfələrlə aşağı səiyyədə tibbi xidmət alırlar: "Çox təəssüf ki,
indi camaatda elə fikir formalaşıb ki, İranda müalicə ucuz
başa gəlir. Amma əksinə iki dəfə artıq xərcə düşürlər. Bir günlük
müayinə üçün İrana üz tutanlar bəzən həftələrlə müayinə
prosedurunun başa çatması üçün bu ölkədə qalıb gözləməli olurlar.
Əksər hallarda isə onları müayinə üçün müxtəlif klinikalara
yollayırlar ki, nəticədə qiymət Azərbaycanda göstərilən tibbi
xidmətdən dəfələrlə baha başa gəlir. Bəzi hallarda isə müalicə
effekt vermir. Ondan sonra ölkəyə qayıdıb Azərbaycanda
müalicələrini davam etdirirlər ki, bəzən səhv müalicə olunan
xəstəni sağaltmaq uzun müddət alır. Ona görə də insanlar xaricdə
müalicə zamanı diqqətli olmalıdırlar. Səhv seçim onların
sağlamlığını təhlükə altında da qoya bilər".