Bakı-Tbilisi-Ceyhan boru kəməri ilə 33 milyon ton neft ixrac olunub
2013-cü ildə Bakı-Tbilisi-Ceyhan əsas ixrac neft boru kəməri (BTC)
ilə 33 milyon ton (247,2 milyon barel) xam neft ixrac olunub.
Movqe.az xəbər verir ki, kəmərin gündəlik ötürmə gücü 1,2 milyon
bareldir. 2013-cü ildə BTC üzrə əsaslı işlərə 75 milyon dollar sərf
edilib. Bu il üçün isə həmin göstəricinin 119 milyon dollar olacağı
nəzərdə tutulur. BTC boru kəməri ilə əsasən "Azəri-Çıraq-Günəşli"
yataqlar blokundan hasil olunan neft və "Şahdəniz"dən çıxarılan
kondensat nəql edilir. Bundan əlavə, kəmərlə Türkmənistan nefti də
ötürülür. Ötən ilin oktyabrından başlayaraq BTC ilə Tengiz neftinin
nəqli bərpa edilib. Ümumiyyətlə, 2006-cı ilin iyunundan - Ceyhandan
ilk tankerin yola salındığı vaxtdan 2013-cü ilin axırınadək BTC
boru kəməri ilə nəql edilmiş təxminən 245,4 milyon ton xam neft
Ceyhan limanında 2390 tankerə yüklənərək dünya bazarlarına
göndərilib.