2014-cü il üçün ali təhsil müəssisələrinə qəbul qaydaları elan
olunub. Tələbə Qəbulu üzrə Dövlət Komissiyasının
(TQDK) mətbuat xidmətindən Movqe.az-a verilən xəbərə
görə, "Abituriyent" jurnalının 1-ci sayı nəşr olunub.
Məlumatda bildirilir ki, Tələbə Qəbulu üzrə Dövlət Komissiyası
"Abituriyent" jurnalının 1-ci sayında 2014/2015-ci tədris ili üçün
Respublikanın ali təhsil müəssisələrinə və tam orta təhsil
bazasında orta ixtisas təhsili müəssisələrinə qəbul qaydalarını və
bütün səviyyələrdən olan təhsil müəssisələrinə qəbul imtahanı
proqramlarını dərc etmişdir. Hər bir abituriyent tələbə qəbulunun
hüquqi əsaslarını təşkil edən və ən etibarlı oriyentir rolunu
oynayan bu sənədlərlə diqqətlə tanış olub öz fəaliyyətini onların
tələblərinə uyğun qurmalıdır. Jurnalda aşağıdakı materiallar
əksini tapıb:2014/2015 - cü tədris ili üçün Azərbaycan
Respublikasının ali təhsil müəssisələrinə və tam orta təhsil
bazasında orta ixtisas təhsili müəssisələrinə tələbə qəbulu
qaydaları
Ali təhsil müəssisələrinə və tam orta təhsil bazasında orta ixtisas
təhsili müəssisələrinə qəbul imtahanı proqramları
Orta ixtisas təhsili müəssisələrinə ümumi orta təhsil bazasında (9
illik)
qəbul imtahanı proqramları
Hərbi liseylərə qəbul imtahanı proqramları
Ali təhsil müəssisələrinə qəbul imtahanı fənləri üzrə test
tapşırığı nümunələri
Fənlər üzrə açıq tipli test tapşırığı nümunələri
Xüsusi təyinatlı təhsil müəssisələrinə qəbul elanları
"Soruşun, cavab verək" rubrikasında oxucuların sorğularına TQDK
mütəxəssislərinin izahlı cavabları
TQDK-da informasiya mübadiləsinin yeni ünvanı bölümündə TQDK-nın
fəaliyyətinin bütün istiqamətlərinin facebook sosial şəbəkəsi
vastəsi ilə ictimaiyyətə çatırılması haqqında məqalə
Test tapşırıqlarının düzgün cavabları və balların hesablanma
qaydası
Qəbul qaydaları - Təhsilin istənilən pillə və səviyyəsinə qəbul
qaydaları təməl statuslu hüquqi sənəddir. Qəbul prosesinin bütün
proseduraları məhz bu sənədə əsaslanır. Qəbul qaydalarında qəbul
kampaniyasının bütün mərhələlərini və tərəflərini (ərizə qəbulu;
ixtisas qrupları, ixtisasların qruplar üzrə siyahısı; qəbul
imtahanı, hər ixtisas qrupunun imtahan fənləri bloku, bunların
əhəmiyyətlilik dərəcəsi; ixtisas seçimi; müsabiqə şərtləri;
qabiliyyət imtahanları; xüsusi təyinatlı təhsil müəssisələrinə
qəbul; abituriyentlərin hüquq və vəzifələri və s.) müəyyən edən
başlıca müddəalar, əsas tənzimləyici normalar əksini tapıb. Bu
qaydaları bilmək hər bir abituriyentə düzgün istiqamət götürməyə,
qəbula hazırlıq işini səmərəli qurmağa, ağıllı ixtisas seçimi
aparmağa kömək edəcəkdir.
Qəbul proqramları – Bu bölmədə ali təhsil müəssisələrinə və tam
orta təhsil bazasında orta ixtisas təhsili müəssisələrinə, ümumi
orta təhsil bazasında orta ixtisas təhsili müəssisələrinə və hərbi
liseylərə imtahan fənləri üzrə qəbul proqramları təqdim edilir.
Burada öyrənilməsi zəruri olan tədris materiallarının əhatə
dairəsi, həcmi, ardıcıllığı, sistemi, ədəbiyyat siyahısı və s. əks
olunmuşdur. Proqramlar ümumtəhsil məktəblərinin tədris proqramları
və müvafiq dərslikləri əsasında hazırlanmışdır. Bununla belə,
məktəb proqramlarından fərqli olaraq qəbul proqramlarında aşağı
siniflərdə keçilən bazis mövzular yuxarı siniflərdə tədris olunan
müvafiq mövzularla üzvi surətdə birləşdirilərək vahid sistem
halında verilib. Odur ki, qəbul imtahanı testləri məktəb
proqramları və dərsliklərindəki bütün materiallara əsaslanmaqla
tərtib edilir.
Test tapşırığı nümunələri – Jurnalın bu sayında yeni test modelləri
dərc edilib. Abituriyentlər bu testlər vasitəsilə öz hazırlıq
səviyyələrini yoxlaya, qəbul imtahanlarında onlara təqdim olunacaq
sualların çətinlik səviyyəsini müəyyənləşdirə bilərlər. Jurnalda
həmin test tapşırıqlarının düzgün cavabları və balların
hesablanması qaydası da verilmişdir.
Fənlər üzrə açıq tipli test nümunələri –2013-cü ildə olduğu kimi bu
il də bütün ixtisas qruplarında iki imtahan fənninin hər biri üzrə
təqdim edilən 25 test tapşırığından 5-i açıq tipli olacaq: I
ixtisas qrupunda – riyaziyyat və fizika; II ixtisas qrupunda –
riyaziyyat və coğrafiya; III ixtisas qrupunda – riyaziyyat və
tarix; IV ixtisas qrupunda – riyaziyyat və kimya fənlərində açıq
tipli test tapşırıqlarından da istifadə ediləcək. Açıq tipli test
tapşırıqları biliklərin daha dərin səviyyələrinin üzə
çıxarılmasına, bilikləri praktikada tətbiqetmə və yaradıcı düşünmə
qabiliyyətlərinin qiymətləndirilməsinə, mənimsənilən ilkin
kompetensiyaların – səriştəlilik keyfiyyətlərinin yoxlanılmasına
yönəlir. Odur ki, şagird və abituriyentlərin açıq tipli test
tapşırıqlarının modelləri, forma və tipləri haqqında
təsəvvürlərinin daha da genişləndirilməsi, bu tipli tapşırıqlarla
işləmək vərdişlərinin inkişaf etdirilməsi üçün onların nümunələri
jurnalın bu sayında verilib. Xatırladaq ki, bu tipli testlər həm də
siniflər üzrə test kitabları, dərs vəsaitləri və bu yaxınlarda
çapdan çıxmış test bankı toplularına daxil edilib. Bu tipli
testlərin mütəmadi olaraq sınaq imtahanlarında da təqdim edilməsi
də nəzərdə tutulur.
Xüsusi təyinatlı təhsil müəssisələrinə qəbul elanları - Xüsusi
təyinatlı təhsil müəssisələrinə, yəni Polis Akademiyasına,
Fövqəladə Hallar Nazirliyinin Akademiyasına, Ali Hərbi Məktəblərə,
Tibb Universitetinin Ali Hərbi Tibb Fakültəsinə, Orta Hərbi Tibb
Məktəbinə və Hərbi liseylərə qəbul iki mərhələdə aparılır. Birinci
mərhələdə abituriyent həmin təhsil müəssisələrində təşkil olunmuş
həkim və seçim komissiyalarından keçməli, sonrakı mərhələdə isə
müəyyən edilmiş fənlərdən TQDK tərəfindən keçirilən test imtahanı
verməlidir. Jurnalda yuxarıda qeyd olunan tədris müəssisələrinə
sənəd qəbulunun tarixi, tələb olunan sənədlərin siyahısı və digər
zəruri materiallar dərc olunmuşdur. Bu bölmədə həmçinin Türkiyə
Respublikasının Quru Qoşunlarının Ali Hərbi Məktəbinə qəbul elanı
da təqdim olunmuşdur.
"Soruşun cavab verək" - Tələbə Qəbulu üzrə Dövlət Komissiyasına
mütəmadi olaraq ictimaiyyətin müxtəlif təbəqələrdən çoxlu sayda
sual, məktub və müraciətlər daxil olur. Jurnalın bu rubrikasında
oxuculardan TQDK-ya daxil olan ən səciyyəvi sorğu və müraciətlərə
Komissiyanın mütəxəssisləri tərəfindən hazırlanmış cavablar təqdim
edilib. Bu material da qəbulla bağlı gəncləri maraqlandıran bir çox
məqamlara aydınlıq gətirəcək.