Azərbaycan prezidenti İlham Əliyev Heydər Əliyev adına İdman-Konsert Kompleksində aparılacaq əsaslı təmir və yenidənqurma işlərinin layihəsi ilə tanış olub.
APA-nın məlumatına görə, dövlət başçısı bu idman-konsert qurğusunda görüləcək işlərlə tanış olmaq üçün Kompleksə gəlib.
Gənclər və idman naziri Azad Rəhimov prezident İlham
Əliyevə görüləcək işlərlə bağlı məlumat verib. Dövlət başçısı
Komplekslə yanaşı, ətraf ərazilərdə abadlıq işlərinin aparılması
ilə bağlı tapşırıqlar verib.
Sonra prezident İlham Əliyev Heydər Əliyev adına İdman-Konsert Kompleksinin arenasında, müxtəlif məşq zallarında və binanın fasadında aparılacaq təmir və yenidənqurma işlərinin layihəsi ilə tanış olub. Bildirilib ki, kompleksin bütün sahələrində, o cümlədən əsas və məşq korpuslarında, müxtəlif idman zallarında əsaslı təmir və bərpa işlərinə başlanılması üçün hazırlıq işləri yeni layihəyə uyğun olaraq artıq başa çatdırılıb. Kompleksdə yeni işıqlandırma, yanğından mühafizə və təhlükəsizlik, eyni zamanda, videomüşahidə və xəbərdarlıq sistemlərinin və müasir liftlərin quraşdırılması üçün işlər davam etdirilir.
Dövlət başçısı təmir və yenidənqurma işlərinin
aparılacağı ayrı-ayrı sahələri gəzdi, işlərin yüksək keyfiyyətlə
görülməsi ilə bağlı müvafiq tapşırıqlarını verib.
Sonra prezident İlham Əliyev Heydər Əliyev adına İdman-Konsert Kompleksinin yanındakı parka gəlib. Dövlət başçısı parkın yenidən qurulması, burada abadlıq və quruculuq işlərinin yüksək səviyyədə həyata keçirilməsi ilə bağlı da göstərişlər verib.