Movqe.Az xəbər verir ki, iyunun 13-də Azərbaycan Mətbuat Şurasının və Dialoq Avrasiya Platformasının Azərbaycan Nümayəndəliyinin birgə təsis etdikləri "Həqiqətə xidmətlərinə görə" mükafatının növbəti təqdimat mərasimi keçirildi. Müəllifi olduğu "Yol romanı"nda türk dünyası ilə bağlı həqiqətlərin geniş ictimaiyyətə çatdırılmasına görə "Ədalət" qəzetinin baş redaktoru, yazıçı-publisist İradə Tuncay mükafatın sayca beşinci laureatı elan olundu.
Mərasimi açan MŞ
sədri Əflatun Amaşov "Həqiqətə xidmətlərinə görə"nin təsisi
məqsədlərindən söhbət açdı. Mükafatın
artıq 5-ci dəfə təqdim edildiyini
deyən Şura sədri "Yol romanı"nı İ.Tuncayın dərin dünyagörüşünün,
hadisə və prosesləri duymaq, görmək və özünəməxsus şəkildə oxucuya
çatdırmaq məharətinin məhsulu adlandırdı: "İradə xanım təcrübəli,
peşəkar və cəsarətli jurnalistdir. Bu onun yazılarında da hiss
olunur."
Dialoq Avrasiya
Platformasının Azərbaycan Nümayəndəliyinin rəhbəri Mustafa Saatçı
mükafata layiq görülən müəllifin əsərini dəyərləndirdiklərini açıqladı. "Müxtəlif şəxslər müxtəlif yerlərdə olurlar,
cürbəcür hadisələrlə rastlaşırlar, amma onların heç də hamısı
müşahidələrini bədiiləşdirmək bacarığında olmurlar. Bu xüsusiyyət
dərin zəka və istedad sahiblərinə məxsusdur ki, İ.Tuncay ərsəyə
gətirdiyi "Yol romanı"nda yaradıcı şəxs üçün zəruri olan bütün
keyfiyyətləri, dəyərləri cəmləşdirə bilib."
"525-ci qəzet"in baş redaktoru Rəşad Məcid
İ. Tuncay yaradıcılığının bədii çalarlarla zənginliyini
vurğulayaraq "Yol romanı"nda müəllifin hiss və duyğular aləminə bir
növ, səyahət etdiyini bildirdi.
MM-in deputatı Aqil Abbasi isə həmin səfərlə
bağlı fərqli səpkili yol qeydlərini qələmə almaq niyyətindən
danışıb. Bunun çətinliyini ifadə edən A.Abbas fikrini belə
əsaslandırıb ki, "Yol romanı"nın təsirinə düşmək istər-istəməz
qaçılmazdır.
Digər çıxış edənlər də müəllifin
intellektual bacarığından söz açaraq tələbə-gənclərin bu romanı
mütləq oxumalı olduqlarını vurğuladılar. Onların fikrincə,
Azərbaycanda tarixən mövcud olmuş və bu gün unudlmaqda olan bir
ənənəni yaşadanlardan biri də İradə Tuncaydır.